wo karenge mera qusur muaf

vo kareñge mirā qusūr muaaf

ho chukā kar chuke zarūr muaaf

husn ko be-qusūr kahte haiñ

hai qusūr aap kā qusūr muaaf

maiñ ne ye jaan kar ḳhatā.eñ kiiñ

har ḳhatā hogī bizzarūr muaaf

vo hañsī aa ga.ī tire lab par

ho gayā vo mirā qusūr muaaf

be-ḳhudī meñ jo ho ḳhatā ham se

kam se kam vo to ho zarūr muaaf

ḳhāmushī un kī mujh se kahtī hai

ab huā ab huā qusūr muaaf

phir na tum baḳhshnā kabhī mujh ko

pahlī taqsīr ho zarūr muaaf

haath bhī joḌe paañv par bhī girā

ab to kah do kiyā qusūr muaaf

hai yahī kaam us kī rahmat kā

hoñge mere gunah zarūr muaaf

aur aadat mirī ḳharāb huī

kaash karte na vo qusūr muaaf

ḳhud ye iqrār-e-jurm karte haiñ

kījiye 'nūh' ko zarūr muaaf

wo karenge mera qusur muaf

ho chuka kar chuke zarur muaf

husn ko be-qusur kahte hain

hai qusur aap ka qusur muaf

main ne ye jaan kar KHataen kin

har KHata hogi bizzarur muaf

wo hansi aa gai tere lab par

ho gaya wo mera qusur muaf

be-KHudi mein jo ho KHata hum se

kam se kam wo to ho zarur muaf

KHamushi un ki mujh se kahti hai

ab hua ab hua qusur muaf

phir na tum baKHshna kabhi mujh ko

pahli taqsir ho zarur muaf

hath bhi joDe panw par bhi gira

ab to kah do kiya qusur muaf

hai yahi kaam us ki rahmat ka

honge mere gunah zarur muaf

aur aadat meri KHarab hui

kash karte na wo qusur muaf

KHud ye iqrar-e-jurm karte hain

kijiye 'nuh' ko zarur muaf