wo kaun se KHatre hain jo gulshan mein nahin hain

vo kaun se ḳhatre haiñ jo gulshan meñ nahīñ haiñ

ham maut ke muñh meñ haiñ nasheman meñ nahīñ haiñ

ye jashn-e-tarab aur ye be-rañgī-e-mahfil

do phuul bhī kyā vaqt ke dāman meñ nahīñ haiñ

chhup chhup ke kise barq-e-havas DhūñDh rahī hai

gintī ke vo ḳhoshe bhī to ḳhirman meñ nahīñ haiñ

imroz ke dikhte hue dil kī maiñ sadā huuñ

dīroz ke nauhe mire shevan meñ nahīñ haiñ

chāk-e-jigar ai dast-e-karam sī to rahā hai

girheñ to kahīñ rishta-e-sozan meñ nahīñ haiñ

majbūr ab itnā bhī asīroñ ko na samjho

aise bhī haiñ kuchh tauq jo gardan meñ nahīñ haiñ

rañg-e-nigah-e-shauq bhare kaun chaman meñ

tinke bhī to 'yāqūb' nasheman meñ nahīñ haiñ

wo kaun se KHatre hain jo gulshan mein nahin hain

hum maut ke munh mein hain nasheman mein nahin hain

ye jashn-e-tarab aur ye be-rangi-e-mahfil

do phul bhi kya waqt ke daman mein nahin hain

chhup chhup ke kise barq-e-hawas DhunDh rahi hai

ginti ke wo KHoshe bhi to KHirman mein nahin hain

imroz ke dikhte hue dil ki main sada hun

diroz ke nauhe mere shewan mein nahin hain

chaak-e-jigar ai dast-e-karam si to raha hai

girhen to kahin rishta-e-sozan mein nahin hain

majbur ab itna bhi asiron ko na samjho

aise bhi hain kuchh tauq jo gardan mein nahin hain

rang-e-nigah-e-shauq bhare kaun chaman mein

tinke bhi to 'yaqub' nasheman mein nahin hain