wo KHauf tha ki jise KHamushi mein dekha gaya

vo ḳhauf thā ki jise ḳhāmushī meñ dekhā gayā

anā-nazhād bahut bebasī meñ dekhā gayā

chhupāyā karb jo mushkil se thā pas-e-chehra

vo dard-o-yās kī be-chehragī meñ dekhā gayā

jo munharif the zamāne meñ sach kī tāqat se

unhīñ ke jhuuT ko ik din nafī meñ dekhā gayā

kabhī vo shahr bhī jugnū sā jagmagātā thā

magar ye pal ki use tīrgī meñ dekhā gayā

maiñ bāñTtī rahī be-laus chāhateñ har dam

mire ḳhulūs ko merī kamī meñ dekhā gayā

udaas raat kī bhīgī sī pahlī bārish ko

kisī kī aañkh kī phailī namī meñ dekhā gayā

dukhoñ kī sabz jaḌeñ kam-nasab nahīñ hotīñ

inheñ to ruuh kī bālīdgī meñ dekhā gayā

har ek maañ ko virāsat meñ ashk milte haiñ

so chārāgar ko hī bechārgī meñ dekhā gayā

hasīñ gharoñ pe likhī chār-sū hai dar-ba-darī

so hijratoñ ko isī be-gharī meñ dekhā gayā

mire qalam ne likhe jabr-o-zulm duniyā ke

har ek dard mirī shā'irī meñ dekhā gayā

jo baaT jhuuT kā mīzān-e-haq pe rakkhā thā

'ġhazal' kā sach bhī usī kaj-ravī meñ dekhā gayā

wo KHauf tha ki jise KHamushi mein dekha gaya

ana-nazhad bahut bebasi mein dekha gaya

chhupaya karb jo mushkil se tha pas-e-chehra

wo dard-o-yas ki be-chehragi mein dekha gaya

jo munharif the zamane mein sach ki taqat se

unhin ke jhuT ko ek din nafi mein dekha gaya

kabhi wo shahr bhi jugnu sa jagmagata tha

magar ye pal ki use tirgi mein dekha gaya

main banTti rahi be-laus chahaten har dam

mere KHulus ko meri kami mein dekha gaya

udas raat ki bhigi si pahli barish ko

kisi ki aankh ki phaili nami mein dekha gaya

dukhon ki sabz jaDen kam-nasab nahin hotin

inhen to ruh ki baalidgi mein dekha gaya

har ek man ko wirasat mein ashk milte hain

so chaaragar ko hi bechaargi mein dekha gaya

hasin gharon pe likhi chaar-su hai dar-ba-dari

so hijraton ko isi be-ghari mein dekha gaya

mere qalam ne likhe jabr-o-zulm duniya ke

har ek dard meri sha'iri mein dekha gaya

jo baT jhuT ka mizan-e-haq pe rakkha tha

'ghazal' ka sach bhi usi kaj-rawi mein dekha gaya