wo kis pyar se kosne de rahe hain

vo kis pyaar se kosne de rahe haiñ

balā.eñ adāvat kī ham le rahe haiñ

paḌe haiñ vo ishrat-kade aaj vīrāñ

jahāñ yaar logoñ ke jalse rahe haiñ

bure aur achchhoñ ke haiñ zikr baaqī

bure hī rahe haiñ na achchhe rahe haiñ

payāmī se kahte haiñ kis ne kahā thā

vo kyuuñ raat bhar yuuñ taḌapte rahe haiñ

zabāñ thak ga.ī kosne dete dete

bas ab ḳhair se chuTkiyāñ le rahe haiñ

na.e daaġh khaa.e haiñ kyā aaj dil par

ye gul to hamesha hī khilte rahe haiñ

jahāñ mil ke baiThe haiñ do-chār ham-sin

hamāre tumhāre hī charche rahe haiñ

'zahīr' aah din zindagānī ke apne

bahut jā chuke aur thoḌe rahe haiñ

wo kis pyar se kosne de rahe hain

balaen adawat ki hum le rahe hain

paDe hain wo ishrat-kade aaj viran

jahan yar logon ke jalse rahe hain

bure aur achchhon ke hain zikr baqi

bure hi rahe hain na achchhe rahe hain

payami se kahte hain kis ne kaha tha

wo kyun raat bhar yun taDapte rahe hain

zaban thak gai kosne dete dete

bas ab KHair se chuTkiyan le rahe hain

nae dagh khae hain kya aaj dil par

ye gul to hamesha hi khilte rahe hain

jahan mil ke baiThe hain do-chaar ham-sin

hamare tumhaare hi charche rahe hain

'zahir' aah din zindagani ke apne

bahut ja chuke aur thoDe rahe hain