wo kisi taur kisi lamha nazar bhi aate

vo kisī taur kisī lamha nazar bhī aate

zinda hote to kabhī lauT ke ghar bhī aate

āsmāñ ham pe agar nazr-e-ināyat kartā

ḳhair-maqdam ke liye shams-o-qamar bhī aate

jin ke kirdār kī ḳhushbū se mahaktī hai fazā

aise mehmān kabhī to mire ghar bhī aate

maiñ agar hotā zamīñ-zādoñ ke lashkar meñ sharīk

mere raste meñ samundar bhī bhañvar bhī aate

merī be-laus mohabbat kā taqāza hai yahī

mujh se milne vo kabhī to mire ghar bhī aate

bādshāhī se adāvat sī rahī hai varna

kuchh ilāqe to mire zer-e-asar bhī aate

sabr se tum ne agar kaam liyā hotā 'riyāz'

ġham ke peḌoñ pe masarrat ke samar bhī aate

wo kisi taur kisi lamha nazar bhi aate

zinda hote to kabhi lauT ke ghar bhi aate

aasman hum pe agar nazr-e-inayat karta

KHair-maqdam ke liye shams-o-qamar bhi aate

jin ke kirdar ki KHushbu se mahakti hai faza

aise mehman kabhi to mere ghar bhi aate

main agar hota zamin-zadon ke lashkar mein sharik

mere raste mein samundar bhi bhanwar bhi aate

meri be-laus mohabbat ka taqaza hai yahi

mujh se milne wo kabhi to mere ghar bhi aate

baadshahi se adawat si rahi hai warna

kuchh ilaqe to mere zer-e-asar bhi aate

sabr se tum ne agar kaam liya hota 'riyaz'

gham ke peDon pe masarrat ke samar bhi aate