wo log jinko hayat apni ghamon mein Dubi hui milegi

vo log jin ko hayāt apnī ġhamoñ meñ Duubī huī milegī

agar mire saath saath aa.eñ to ik na.ī zindagī milegī

unhīñ ko haañ bas unhīñ ko ai 'qais' manzil-e-zindagī malegī

musībatoñ ke hujūm meñ bhī laboñ pe jin ke hañsī malegī

qafas kī tārīk ḳhalvatoñ par haiñ mo'tariz kyuuñ ye ahl-e-duniyā

chaman meñ bhī āshiyāñ jaleñge to phir kahīñ raushnī milegī

maiñ terī āñkhoñ ke āsare par hī mai-kade se uThā thā lekin

ye kyā ḳhabar thī ki terī āñkhoñ se aur bhī tishnagī milegī

agar ujāloñ kī hai tamannā na bujhne paa.e charāġh dil kā

ki dil meñ jab raushnī na hogī to har taraf tīrgī milegī

qasam hai tum ko mire muqaddar kī yuuñ savāro na apnī zulfeñ

tumhīñ agar uljhaneñ na doge to phir kahāñ zindagī milegī

ye log jo ḳhanda-zan haiñ mujh par inheñ kuchh is kī ḳhabar nahīñ hai

ki merī rūdād-e-gum-rahī se zamāne ko rahbarī milegī

wo log jin ko hayat apni ghamon mein Dubi hui milegi

agar mere sath sath aaen to ek nai zindagi milegi

unhin ko han bas unhin ko ai 'qais' manzil-e-zindagi malegi

musibaton ke hujum mein bhi labon pe jin ke hansi malegi

qafas ki tarik KHalwaton par hain mo'tariz kyun ye ahl-e-duniya

chaman mein bhi aashiyan jalenge to phir kahin raushni milegi

main teri aankhon ke aasare par hi mai-kade se uTha tha lekin

ye kya KHabar thi ki teri aankhon se aur bhi tishnagi milegi

agar ujalon ki hai tamanna na bujhne pae charagh dil ka

ki dil mein jab raushni na hogi to har taraf tirgi milegi

qasam hai tum ko mere muqaddar ki yun sawaro na apni zulfen

tumhin agar uljhanen na doge to phir kahan zindagi milegi

ye log jo KHanda-zan hain mujh par inhen kuchh is ki KHabar nahin hai

ki meri rudad-e-gum-rahi se zamane ko rahbari milegi