wo mai-parast hun badli na jab nazar aai

vo mai-parast huuñ badlī na jab nazar aa.ī

simaT ga.iiñ jo siyah-kāriyāñ ghaTā chhā.ī

safed baal hue shab huī javānī kī

damīda sub.h huī chauñk sar pe dhuup aa.ī

haram meñ ḳhaak huā huuñ vo āshiq-e-barbād

miyān-e-dair havā-e-butāñ uḌā laa.ī

maiñ vo huuñ bulbul-e-bāġh-e-jahāñ koī gul ho

diyā dil us ko mohabbat kī jis meñ bū paa.ī

chaman meñ jā ke jo pūchhā bahār-e-gul kā sabāt

khilī na thī jo kalī muskurā ke murjhā.ī

hisār-e-husn ke haale meñ muñh nazar aayā

milā ke haath jo lī us hasīñ ne añgḌā.ī

maiñ vo kisān huuñ khetī pe barq ne jis kī

duā jo meñh ke liye kī to aag barsā.ī

rahe mudām yūñhī ishq meñ tah-o-bālā

jo ġham se baiTh gayā dil to uThne aañkh aa.ī

wo mai-parast hun badli na jab nazar aai

simaT gain jo siyah-kariyan ghaTa chhai

safed baal hue shab hui jawani ki

damida subh hui chaunk sar pe dhup aai

haram mein KHak hua hun wo aashiq-e-barbaad

miyan-e-dair hawa-e-butan uDa lai

main wo hun bulbul-e-bagh-e-jahan koi gul ho

diya dil us ko mohabbat ki jis mein bu pai

chaman mein ja ke jo puchha bahaar-e-gul ka sabaat

khili na thi jo kali muskura ke murjhai

hisar-e-husn ke haale mein munh nazar aaya

mila ke hath jo li us hasin ne angDai

main wo kisan hun kheti pe barq ne jis ki

dua jo meinh ke liye ki to aag barsai

rahe mudam yunhi ishq mein tah-o-baala

jo gham se baiTh gaya dil to uThne aankh aai