wo mera hai to kabhi bhi na aazmaun use

vo merā hai to kabhī bhī na āzmā.ūñ use

mirā nahīñ hai to phir kis liye satā.ūñ use

vo māhtāb se baḌh kar ke ho gayā sūraj

jo ḳhud bhī aa.e to kaise gale lagā.ūñ use

maiñ chāhtā huuñ mirā pyaar us se aisā ho

vo rūThtā rahe maiñ bār-hā manā.ūñ use

tamām din kī mashaqqat-bharī takān ke ba.ad

tamām raat mohabbat se phir jagā.ūñ use

mirā habīb mire ishq meñ khilaunā ho

vo TuuT jaa.e to phir joḌ kar banā.ūñ use

huā kare mirā us se muqābla yuuñ bhī

usī se jiit ke us ko hī haar jā.ūñ use

vo jāntā hai mire har savāl kā matlab

agar javāb bhī de de to maan jā.ūñ use

yahī duā hai mirī rabb-e-do-jahāñ se 'bilāl'

kisī se ahd karūñ gar to phir nibhā.ūñ use

wo mera hai to kabhi bhi na aazmaun use

mera nahin hai to phir kis liye sataun use

wo mahtab se baDh kar ke ho gaya suraj

jo KHud bhi aae to kaise gale lagaun use

main chahta hun mera pyar us se aisa ho

wo ruThta rahe main bar-ha manaun use

tamam din ki mashaqqat-bhari takan ke baad

tamam raat mohabbat se phir jagaun use

mera habib mere ishq mein khilauna ho

wo TuT jae to phir joD kar banaun use

hua kare mera us se muqabla yun bhi

usi se jit ke us ko hi haar jaun use

wo jaanta hai mere har sawal ka matlab

agar jawab bhi de de to man jaun use

yahi dua hai meri rabb-e-do-jahan se 'bilal'

kisi se ahd karun gar to phir nibhaun use