wo mere bare mein jo kuchh bata raha tha mujhe

vo mere baare meñ jo kuchh batā rahā thā mujhe

ġhalat thā phir bhī yaqīn us pe aa rahā thā mujhe

tañg aa ke us ne mujhe TuuTā phūTā chhoḌ diyā

ba-sad-ḳhulūs kabhī jo banā rahā thā mujhe

amīr-e-shahr ne masnad kī peshkash kī thī

shikārī jaal meñ apne phañsā rahā thā mujhe

phir us ke baa'd bahut ghus ke phaT gayā kāġhaz

ragaḌ ragaḌ ke rubber vo miTā rahā thā mujhe

maiñ ḳhush nahīñ thā magar ḳhush dikhā.ī detā thā

koī latīfe sunā kar hañsā rahā thā mujhe

na jaane kyoñ maiñ use bhūlne kī zid par thā

na jaane kyoñ vo bahut yaad aa rahā thā mujhe

mire raqīb se vo mahv-e-guftugū thā 'kamāl'

vo us kā dost nahīñ thā satā rahā thā mujhe

wo mere bare mein jo kuchh bata raha tha mujhe

ghalat tha phir bhi yaqin us pe aa raha tha mujhe

tang aa ke us ne mujhe TuTa phuTa chhoD diya

ba-sad-KHulus kabhi jo bana raha tha mujhe

amir-e-shahr ne masnad ki peshkash ki thi

shikari jal mein apne phansa raha tha mujhe

phir us ke ba'd bahut ghus ke phaT gaya kaghaz

ragaD ragaD ke rubber wo miTa raha tha mujhe

main KHush nahin tha magar KHush dikhai deta tha

koi latife suna kar hansa raha tha mujhe

na jaane kyon main use bhulne ki zid par tha

na jaane kyon wo bahut yaad aa raha tha mujhe

mere raqib se wo mahw-e-guftugu tha 'kamal'

wo us ka dost nahin tha sata raha tha mujhe