wo mere KHwab ki tabir to batae mujhe

vo mere ḳhvāb kī ta.abīr to batā.e mujhe

maiñ dhuup meñ huuñ magar DhūñDte haiñ saa.e mujhe

maiñ raushnī kī kisī saltanat kā shahzāda

magar charāġh mile haiñ bujhe-bujhā.e mujhe

vo jā chukā hai to naqsh-e-qadam bhī miT jaa.eñ

bichhaḌ gayā hai to ab yaad bhī na aa.e mujhe

kisī javāz kā honā hī kyā zarūrī hai

agar vo chhoḌnā chāhe to chhoḌ jaa.e mujhe

to motiyoñ meñ na tulne kā rañj ḳhatm huā

kisī kī aañkh ke aañsū ḳharīd laa.e mujhe

larazte kāñpte hāthoñ ko phir na ho zahmat

ḳhudā kare ki yahī zahr raas aa.e mujhe

maiñ chāhtā huuñ kabhī yuuñ bhī ho ki merī tarah

vo mujh ko DhūñDne nikle magar na paa.e mujhe

wo mere KHwab ki tabir to batae mujhe

main dhup mein hun magar DhunDte hain sae mujhe

main raushni ki kisi saltanat ka shahzada

magar charagh mile hain bujhe-bujhae mujhe

wo ja chuka hai to naqsh-e-qadam bhi miT jaen

bichhaD gaya hai to ab yaad bhi na aae mujhe

kisi jawaz ka hona hi kya zaruri hai

agar wo chhoDna chahe to chhoD jae mujhe

to motiyon mein na tulne ka ranj KHatm hua

kisi ki aankh ke aansu KHarid lae mujhe

larazte kanpte hathon ko phir na ho zahmat

KHuda kare ki yahi zahr ras aae mujhe

main chahta hun kabhi yun bhi ho ki meri tarah

wo mujh ko DhunDne nikle magar na pae mujhe