wo mere shisha-e-dil par KHarash chhoD gaya

vo mere shīsha-e-dil par ḳharāsh chhoḌ gayā

dayār-e-rūh meñ ik irti'āsh chhoḌ gayā

qadam qadam pe huā jab munāfiqat kā shikār

to apne shahr kī vo būd-o-bāsh chhoḌ gayā

vahāñ se manzil-e-irfān-e-zāt duur na thī

vo jis maqām pe us kī talāsh chhoḌ gayā

vo shaḳhs aap hī qātil thā aap hī maqtūl

jahāñ jahāñ bhī gayā apnī laash chhoḌ gayā

kamāl darja thā us meñ shu.ūr-e-tīsha-garī

mire vujūd ko vo paash paash chhoḌ gayā

thā us ke dast-e-hunar meñ bhī āzarī kā kamāl

magar vo apnā hī but nā-tarāsh chhoḌ gayā

wo mere shisha-e-dil par KHarash chhoD gaya

dayar-e-ruh mein ek irti'ash chhoD gaya

qadam qadam pe hua jab munafiqat ka shikar

to apne shahr ki wo bud-o-bash chhoD gaya

wahan se manzil-e-irfan-e-zat dur na thi

wo jis maqam pe us ki talash chhoD gaya

wo shaKHs aap hi qatil tha aap hi maqtul

jahan jahan bhi gaya apni lash chhoD gaya

kamal darja tha us mein shuur-e-tisha-gari

mere wujud ko wo pash pash chhoD gaya

tha us ke dast-e-hunar mein bhi aazari ka kamal

magar wo apna hi but na-tarash chhoD gaya