wo miThe bolon ke jadu kahan gae

vo mīThe boloñ ke jaadū kahāñ ga.e

bolne vaale achchhī urdu kahāñ ga.e

kaañ jā rā ai bolte haiñ he khā jaate haiñ

vo lahjoñ lafzoñ par qaabū kahāñ ga.e

bañgālī ke vo kaale aur jāmunī chūran

vo chaTḳhāre haahā hū-hū kahāñ ga.e

qulfī vaale baabā kī reḌhī kī ghanTī

aur gole ġhanDe ke ras-jū kahāñ ga.e

laḌkoñ kā vo māchis aur lakḌī kā khel

aag meñ pakne vaale aalū kahāñ ga.e

jab ham donoñ ham the to bāham the ham

jab se hue haiñ maiñ maiñ tū-tū kahāñ ga.e

vo rīleñ vo camere jaane kahāñ paḌe haiñ

ye bhī yaad nahīñ vo photo kahāñ ga.e

golī pistol launcher aur bam laayā kaun

lāteñ mukke DanDe chāqū kahāñ ga.e

lohe aur cement meñ duniyā simaT ga.ī hai

hare hare lahrāte jaadū kahāñ ga.e

wo miThe bolon ke jadu kahan gae

bolne wale achchhi urdu kahan gae

kan ja ra ai bolte hain he kha jate hain

wo lahjon lafzon par qabu kahan gae

bangali ke wo kale aur jamuni churan

wo chaTKHare haha hu-hu kahan gae

qulfi wale baba ki reDhi ki ghanTi

aur gole ghanDe ke ras-ju kahan gae

laDkon ka wo machis aur lakDi ka khel

aag mein pakne wale aalu kahan gae

jab hum donon hum the to baham the hum

jab se hue hain main main tu-tu kahan gae

wo rilen wo camere jaane kahan paDe hain

ye bhi yaad nahin wo photo kahan gae

goli pistol launcher aur bam laya kaun

laten mukke DanDe chaqu kahan gae

lohe aur cement mein duniya simaT gai hai

hare hare lahraate jadu kahan gae