wo mera kasrat-e-anwar se hairan hona

vo mirā kasrat-e-anvār se hairāñ honā

har taraf tūr-ba-kaf un kā numāyāñ honā

kis qadar hai tirī rahmat pe bharosā yā-rab

mujh ko aayā na gunāhoñ pe pashemāñ honā

ahl-e-dil chal to diye haiñ dar-e-jānāñ kī taraf

kis kī qismat meñ hai ḳhāk-e-dar-e-jānāñ honā

un ke va.ade kī ḳhushī kā ye mukammal hai subūt

shaam se pahle mire ghar meñ charāġhāñ honā

aadmī chāhe to koshish se farishta ban jaa.e

saḳht dushvār hai us kā magar insāñ honā

faiz ye mere junūñ kā hai chaman meñ jaarī

ġhunchoñ ne siikh liyā chāk-garebāñ honā

jis meñ afsurda hoñ ġhunche bhī bahāreñ bhī 'nashāt'

qābil-e-faḳhr kahāñ us kā gulistāñ honā

wo mera kasrat-e-anwar se hairan hona

har taraf tur-ba-kaf un ka numayan hona

kis qadar hai teri rahmat pe bharosa ya-rab

mujh ko aaya na gunahon pe pasheman hona

ahl-e-dil chal to diye hain dar-e-jaanan ki taraf

kis ki qismat mein hai KHak-e-dar-e-jaanan hona

un ke wade ki KHushi ka ye mukammal hai subut

sham se pahle mere ghar mein charaghan hona

aadmi chahe to koshish se farishta ban jae

saKHt dushwar hai us ka magar insan hona

faiz ye mere junun ka hai chaman mein jari

ghunchon ne sikh liya chaak-gareban hona

jis mein afsurda hon ghunche bhi bahaaren bhi 'nashat'

qabil-e-faKHr kahan us ka gulistan hona