wo meri dost wo hamdard wo gham-KHwar aankhen

vo mirī dost vo hamdard vo ġham-ḳhvār āñkheñ

ek ma.asūm mohabbat kī gunahgār āñkheñ

shoḳh-o-shādāb-o-hasīñ sāda-o-purkār āñkheñ

mast-o-sarshār-o-javāñ be-ḳhud-o-hoshiyār āñkheñ

tirchhī nazroñ meñ vo uljhī huī sūraj kī kiran

apne duzdīda ishāroñ meñ giraftār āñkheñ

jumbish-e-abrū-o-mizhgāñ kai ḳhunuk saa.e meñ

ātish-afroz junūñ-ḳhez sharar-bār āñkheñ

kaifiyat dil kī sunātī huī ek ek nigāh

be-zabāñ ho ke bhī vo mā.il-e-guftār āñkheñ

mausam-e-gul meñ vo uḌte hue bhauñroñ kī tarah

ġhuncha-e-dil pe vo kartī huī yalġhār āñkheñ

kabhī chhalkī huī sharbat ke kaToroñ kī tarah

aur kabhī zahr meñ Duubī huī talvār āñkheñ

kabhī Thahrī huī yaḳh-basta ġhamoñ kī jhīleñ

kabhī sahmā huā simTā huā ik pyaar āñkheñ

kabhī jhukte hue bādal kabhī girtī bijlī

kabhī uThtī huī āmāda-e-paikār āñkheñ

nok-e-abrū meñ kabhī talḳhī-e-inkār liye

kabhī ghole hue shīrīnī-e-iqrār āñkheñ

aañch meñ apnī javānī kī sulagtī chitvan

shabnam-e-ashk meñ dhoī huī gulnār āñkheñ

husn ke chāñd se mukhḌe pe chamakte taare

haa.e āñkheñ vo harīf-e-lab-o-ruḳhsār āñkheñ

ishva-o-ġhamza-o-andāz-o-adā par nāzāñ

apne pindār-e-javānī kī parastār āñkheñ

ruuh ko rog mohabbat kā lagā detī haiñ

sehat-e-dil jo atā kartī haiñ bīmār āñkheñ

sehn-e-zindāñ meñ hai phir raat ke tāroñ kā hujūm

sham.a kī tarah farozāñ sar-e-dīvār āñkheñ

wo meri dost wo hamdard wo gham-KHwar aankhen

ek masum mohabbat ki gunahgar aankhen

shoKH-o-shadab-o-hasin sada-o-purkar aankhen

mast-o-sarshaar-o-jawan be-KHud-o-hoshiyar aankhen

tirchhi nazron mein wo uljhi hui suraj ki kiran

apne duzdida ishaaron mein giraftar aankhen

jumbish-e-abru-o-mizhgan kai KHunuk sae mein

aatish-afroz junun-KHez sharar-bar aankhen

kaifiyat dil ki sunati hui ek ek nigah

be-zaban ho ke bhi wo mail-e-guftar aankhen

mausam-e-gul mein wo uDte hue bhaunron ki tarah

ghuncha-e-dil pe wo karti hui yalghaar aankhen

kabhi chhalki hui sharbat ke kaToron ki tarah

aur kabhi zahr mein Dubi hui talwar aankhen

kabhi Thahri hui yaKH-basta ghamon ki jhilen

kabhi sahma hua simTa hua ek pyar aankhen

kabhi jhukte hue baadal kabhi girti bijli

kabhi uThti hui aamada-e-paikar aankhen

nok-e-abru mein kabhi talKHi-e-inkar liye

kabhi ghole hue shirini-e-iqrar aankhen

aanch mein apni jawani ki sulagti chitwan

shabnam-e-ashk mein dhoi hui gulnar aankhen

husn ke chand se mukhDe pe chamakte tare

hae aankhen wo harif-e-lab-o-ruKHsar aankhen

ishwa-o-ghamza-o-andaz-o-ada par nazan

apne pindar-e-jawani ki parastar aankhen

ruh ko rog mohabbat ka laga deti hain

sehat-e-dil jo ata karti hain bimar aankhen

sehn-e-zindan mein hai phir raat ke taron ka hujum

shama ki tarah farozan sar-e-diwar aankhen