wo meri duniya ka malik tha magar mera na tha

vo mirī duniyā kā mālik thā magar merā na thā

maiñ ne is andāz par pahle kabhī sochā na thā

ek muddat tak rahā ḳhush-fahmiyoñ meñ mubtalā

aa.ine ke rū-ba-rū jab tak mirā chehra na thā

tohmatoñ ko ek aise ajnabī kī thī talāsh

jo kabhī ghar se nikal kar raah meñ Thahrā na thā

ho chukī thī shohrateñ rusvā.iyoñ se ham-kanār

bhuul jaatā maiñ jise vo sāneha aisā na thā

merī nazroñ meñ hai ḳhāka vo bhī husn-e-dost kā

jis ko logoñ ne abhī tak zehn meñ sochā na thā

maiñ uThūñ to rang laa.eñ tazkaroñ ke silsile

log itnā to kaheñ ki aadmī achchhā na thā

log is andāz meñ dete haiñ duniyā kī misāl

maiñ to jaise tajraboñ ke daur se guzrā na thā

ik nayā ehsās dete haiñ vo ahl-e-sang ko

aabrū ke saath rahnā shahr meñ achchhā na thā

kyā asar-andāz hotā us pe afsāna 'nazar'

lafz bhī māñge hue mafhūm bhī apnā na thā

wo meri duniya ka malik tha magar mera na tha

main ne is andaz par pahle kabhi socha na tha

ek muddat tak raha KHush-fahmiyon mein mubtala

aaine ke ru-ba-ru jab tak mera chehra na tha

tohmaton ko ek aise ajnabi ki thi talash

jo kabhi ghar se nikal kar rah mein Thahra na tha

ho chuki thi shohraten ruswaiyon se ham-kanar

bhul jata main jise wo saneha aisa na tha

meri nazron mein hai KHaka wo bhi husn-e-dost ka

jis ko logon ne abhi tak zehn mein socha na tha

main uThun to rang laen tazkaron ke silsile

log itna to kahen ki aadmi achchha na tha

log is andaz mein dete hain duniya ki misal

main to jaise tajrabon ke daur se guzra na tha

ek naya ehsas dete hain wo ahl-e-sang ko

aabru ke sath rahna shahr mein achchha na tha

kya asar-andaz hota us pe afsana 'nazar'

lafz bhi mange hue mafhum bhi apna na tha