wo musalsal chup hai tere samne tanhai mein

vo musalsal chup hai tere sāmne tanhā.ī meñ

sochtā kyā hai utar jā baat kī gahrā.ī meñ

surḳh-rū hone na paayā thā ki piilā paḌ gayā

chāñd kā bhī haath thā jazbāt kī paspā.ī meñ

be-libāsī hī na ban jaa.e kahīñ terā libās

aa.ine ke sāmne pāgal na ho tanhā.ī meñ

tū agar phal hai to ḳhud hī TuuT kar dāman meñ aa

maiñ na pheñkūñgā koī patthar tirī añgnā.ī meñ

rāt-bhar vo apne bistar par paḌā rotā rahā

duur ik āvāz banjar ho ga.ī shahnā.ī meñ

dā.ere baḌhte ga.e parkār kā muñh khul gayā

vo bhī dāḳhil ho gayā ab sarhad-e-rusvā.ī meñ

habs to dil meñ thā lekin aañkh tap kar rah ga.ī

raat saarā shahr Duubā dard kī purvā.ī meñ

aañkh tak bhī ab jhapakne kī mujhe fursat nahīñ

naqsh hai dīvār par tasvīr hai bīnā.ī meñ

log vāpas ho ga.e 'sājid' numā.ish gaah se

aur maiñ khoyā rahā ik mahshar-e-ra.anā.ī meñ

wo musalsal chup hai tere samne tanhai mein

sochta kya hai utar ja baat ki gahrai mein

surKH-ru hone na paya tha ki pila paD gaya

chand ka bhi hath tha jazbaat ki paspai mein

be-libasi hi na ban jae kahin tera libas

aaine ke samne pagal na ho tanhai mein

tu agar phal hai to KHud hi TuT kar daman mein aa

main na phenkunga koi patthar teri angnai mein

raat-bhar wo apne bistar par paDa rota raha

dur ek aawaz banjar ho gai shahnai mein

daere baDhte gae parkar ka munh khul gaya

wo bhi daKHil ho gaya ab sarhad-e-ruswai mein

habs to dil mein tha lekin aankh tap kar rah gai

raat sara shahr Duba dard ki purwai mein

aankh tak bhi ab jhapakne ki mujhe fursat nahin

naqsh hai diwar par taswir hai binai mein

log wapas ho gae 'sajid' numaish gah se

aur main khoya raha ek mahshar-e-ranai mein