wo muskura ke jidhar se nikal gae honge

vo muskurā ke jidhar se nikal ga.e hoñge

nigāh-e-shauq meñ aañsū machal ga.e hoñge

guzar ke hosh kī manzil se tere dīvāne

junūñ kī had se bhī aage nikal ga.e hoñge

butān-e-dahr ke vā'de ġhalat sahī lekin

hazār-hā dil-e-nādāñ bahal ga.e hoñge

jo ham-safar sar-e-manzil nazar nahīñ aate

junūn-e-shauq meñ aage nikal ga.e hoñge

shab-e-firāq se ghabrā ga.e the dīvāne

talāsh-e-sub.h se ghar se nikal ga.e hoñge

ik inqalāb se 'ālam guzar rahā hai 'shamīm'

mujhe yaqīn hai vo bhī badal ga.e hoñge

wo muskura ke jidhar se nikal gae honge

nigah-e-shauq mein aansu machal gae honge

guzar ke hosh ki manzil se tere diwane

junun ki had se bhi aage nikal gae honge

butan-e-dahr ke wa'de ghalat sahi lekin

hazar-ha dil-e-nadan bahal gae honge

jo ham-safar sar-e-manzil nazar nahin aate

junun-e-shauq mein aage nikal gae honge

shab-e-firaq se ghabra gae the diwane

talash-e-subh se ghar se nikal gae honge

ek inqalab se 'alam guzar raha hai 'shamim'

mujhe yaqin hai wo bhi badal gae honge