wo nikhat-e-gesu phir ai ham-nafasan aai

vo nik.hat-e-gesū phir ai ham-nafasāñ aa.ī

ab dam meñ dam aayā hai ab jaan meñ jaañ aa.ī

har tanz pe rindoñ ne sar apnā jhukāyā hai

us par bhī na vā'iz ko tahzīb-e-muġhāñ aa.ī

jab bhī ye ḳhayāl aayā kyā dair hai kyā kā'ba

nāqūs-e-brahman se āvāz-e-azāñ aa.ī

us shoḳh kī bātoñ ko dushvār hai dohrānā

jab bād-e-sabā aa.ī āshufta-bayāñ aa.ī

urdu jise kahte haiñ tahzīb kā chashma hai

vo shaḳhs mohazzab hai jis ko ye zabāñ aa.ī

ye ḳhanda-e-gul kyā hai ham ne to ye dekhā hai

kaliyoñ ke tabassum meñ chhup chhup ke fuġhāñ aa.ī

ābād ḳhayāl us kā shādāñ rahe yaad us kī

ik dushman-e-dil aayā ik āfat-e-jāñ aa.ī

ash.ār-e-'ravish' sun kar tausīf o satā.ish ko

'sādī' kā bayāñ aayā 'hāfiz' kī zabāñ aa.ī

wo nikhat-e-gesu phir ai ham-nafasan aai

ab dam mein dam aaya hai ab jaan mein jaan aai

har tanz pe rindon ne sar apna jhukaya hai

us par bhi na wa'iz ko tahzib-e-mughan aai

jab bhi ye KHayal aaya kya dair hai kya ka'ba

naqus-e-brahman se aawaz-e-azan aai

us shoKH ki baaton ko dushwar hai dohrana

jab baad-e-saba aai aashufta-bayan aai

urdu jise kahte hain tahzib ka chashma hai

wo shaKHs mohazzab hai jis ko ye zaban aai

ye KHanda-e-gul kya hai hum ne to ye dekha hai

kaliyon ke tabassum mein chhup chhup ke fughan aai

aabaad KHayal us ka shadan rahe yaad us ki

ek dushman-e-dil aaya ek aafat-e-jaan aai

ashaar-e-'rawish' sun kar tausif o sataish ko

'sadi' ka bayan aaya 'hafiz' ki zaban aai