wo pech-o-KHam jahan ki har ek rahguzar mein hai

vo pech-o-ḳham jahāñ kī har ik rahguzar meñ hai

ḳhud kārvān-e-vaqt bhī ab tak safar meñ hai

yaaro kahāñ vo jalva-e-shams-o-qamar meñ hai

jo nuur jo ziyā mire dāġh-e-jigar meñ hai

hai vāda-e-visāl-e-sanam kī vo sarḳhushī

har shai hasīn ab mirī fikr-o-nazar meñ hai

manzil baġhair tai kiye letā nahīñ huuñ chain

ye dam ye hausla hī kahāñ rāhbar meñ hai

kuchh ġham nahīñ ki ho mirī hadd-e-nazar se duur

lekin tumhārī yaad to qalb-o-jigar meñ hai

har bahr har zamīn meñ kahtā huuñ ḳhuub sher

kab ye kamāl ab kisī ahl-e-hunar meñ hai

jis se ayaañ ho dahr kā ehsās-e-be-ruḳhī

ā.īna vo 'jamāl' hamārī nazar meñ hai

wo pech-o-KHam jahan ki har ek rahguzar mein hai

KHud karwan-e-waqt bhi ab tak safar mein hai

yaro kahan wo jalwa-e-shams-o-qamar mein hai

jo nur jo ziya mere dagh-e-jigar mein hai

hai wada-e-visal-e-sanam ki wo sarKHushi

har shai hasin ab meri fikr-o-nazar mein hai

manzil baghair tai kiye leta nahin hun chain

ye dam ye hausla hi kahan rahbar mein hai

kuchh gham nahin ki ho meri hadd-e-nazar se dur

lekin tumhaari yaad to qalb-o-jigar mein hai

har bahr har zamin mein kahta hun KHub sher

kab ye kamal ab kisi ahl-e-hunar mein hai

jis se ayan ho dahr ka ehsas-e-be-ruKHi

aaina wo 'jamal' hamari nazar mein hai