wo ram-shiar mera shoKH-dida aaya tha

vo ram-shi.ār mirā shoḳh-dīda aayā thā

vo ishva-sanj kashīda kashīda aayā thā

kiyā hai chashm-e-muravvat ne aaj mā.il-e-mehr

maiñ un kī bazm se kal ābdīda aayā thā

jo rāz-e-dil thā vo ḳhalvat meñ sab kahā ham ne

koī bhī saath nahīñ thā jarīda aayā thā

vo murġh-e-bismil-e-ulfat fidā-e-husn tirā

ba-shakl-e-tā.ir-e-rañg-e-parīda aayā thā

vo tere jazb-e-mohabbat kā shauq-e-mastāna

junūñ-libās garebāñ darīda aayā thā

tumhārā bulbul-e-kashmīr shefta shaidā

bahār-e-jalva liye ik qasīda aayā thā

sitam-zarīf haiñ pīr-e-muġhāñ bhī mai-ḳhvāro

kahāñ surūr meñ 'sāqī' na-dīda aayā thā

wo ram-shiar mera shoKH-dida aaya tha

wo ishwa-sanj kashida kashida aaya tha

kiya hai chashm-e-murawwat ne aaj mail-e-mehr

main un ki bazm se kal aabdida aaya tha

jo raaz-e-dil tha wo KHalwat mein sab kaha hum ne

koi bhi sath nahin tha jarida aaya tha

wo murgh-e-bismil-e-ulfat fida-e-husn tera

ba-shakl-e-tair-e-rang-e-parida aaya tha

wo tere jazb-e-mohabbat ka shauq-e-mastana

junun-libas gareban darida aaya tha

tumhaara bulbul-e-kashmir shefta shaida

bahaar-e-jalwa liye ek qasida aaya tha

sitam-zarif hain pir-e-mughan bhi mai-KHwaro

kahan surur mein 'saqi' na-dida aaya tha