wo rang-o-rup nigah-o-jamal hai hi nahin

vo rang-o-rūp nigāh-o-jamāl hai hī nahīñ

tumhāre husn kī koī misāl hai hī nahīñ

bayān husn-e-mukammal ko koī kaise kare

kisī zabān meñ itnī majāl hai hī nahīñ

har ek shai ko fanā hai ye ham ne jaan liyā

bas ek 'ishq hai jis ko zavāl hai hī nahīñ

azaan izn-e-'ibādat hai haañ magar afsos

haram hai sāmne lekin bilāl hai hī nahīñ

amīr-e-shahr ko fikr-e-najāt hai lekin

faqīr-e-'ishq ko koī malāl hai hī nahīñ

ḳhayāl-e-hazrat-e-be-dil ko chhū ke aa jaa.e

kisī kī soch meñ aisā kamāl hai hī nahīñ

javāb dene ko hāzir huuñ maiñ magar sāhib

kisī ke lab pe koī bhī savāl hai hī nahīñ

wo rang-o-rup nigah-o-jamal hai hi nahin

tumhaare husn ki koi misal hai hi nahin

bayan husn-e-mukammal ko koi kaise kare

kisi zaban mein itni majal hai hi nahin

har ek shai ko fana hai ye hum ne jaan liya

bas ek 'ishq hai jis ko zawal hai hi nahin

azan izn-e-'ibaadat hai han magar afsos

haram hai samne lekin bilal hai hi nahin

amir-e-shahr ko fikr-e-najat hai lekin

faqir-e-'ishq ko koi malal hai hi nahin

KHayal-e-hazrat-e-be-dil ko chhu ke aa jae

kisi ki soch mein aisa kamal hai hi nahin

jawab dene ko hazir hun main magar sahib

kisi ke lab pe koi bhi sawal hai hi nahin