wo samne hon aur nazar ko KHabar na ho

vo sāmne hoñ aur nazar ko ḳhabar na ho

barbād is qadar bhī shu.ūr-e-nazar na ho

tujh se ilaaj agar na ho ai chārāgar na ho

rāz-e-ġham-e-marīz magar dar-ba-dar na ho

āñkheñ bichhī huī haiñ bahut duur duur tak

mumkin nahīñ ki aap kī ye rahguzar na ho

mujh par baras paḌe na kahīñ barhamī-e-zulf

jo tere sar balā hai mire dil ke sar na ho

tujh se hī mere jazba-e-ulfat meñ jaan hai

ai zindagī hayāt tirī muḳhtasar na ho

hai vus.at-e-nigāh ko kuchh aur justujū

ai hadd-e-kā.enāt tū hadd-e-nazar na ho

rāh-e-vafā kā lutf bhī kuchh chal ke dekhiye

is rahguzar pe aap kā shāyad guzar na ho

jazbāt-e-dil ko laakh chhupāte ho tum magar

is bazm meñ kahīñ koī ahl-e-nazar na ho

kyā ho gayā hai tujh ko ḳhudā jaane ai 'zakī'

dil meñ koī ho aur nazar ko ḳhabar na ho

wo samne hon aur nazar ko KHabar na ho

barbaad is qadar bhi shuur-e-nazar na ho

tujh se ilaj agar na ho ai chaaragar na ho

raaz-e-gham-e-mariz magar dar-ba-dar na ho

aankhen bichhi hui hain bahut dur dur tak

mumkin nahin ki aap ki ye rahguzar na ho

mujh par baras paDe na kahin barhami-e-zulf

jo tere sar bala hai mere dil ke sar na ho

tujh se hi mere jazba-e-ulfat mein jaan hai

ai zindagi hayat teri muKHtasar na ho

hai wusat-e-nigah ko kuchh aur justuju

ai hadd-e-kaenat tu hadd-e-nazar na ho

rah-e-wafa ka lutf bhi kuchh chal ke dekhiye

is rahguzar pe aap ka shayad guzar na ho

jazbaat-e-dil ko lakh chhupate ho tum magar

is bazm mein kahin koi ahl-e-nazar na ho

kya ho gaya hai tujh ko KHuda jaane ai 'zaki'

dil mein koi ho aur nazar ko KHabar na ho