wo sanwarenge mujhe kya gul-e-zebai tak

vo sañvāreñge mujhe kyā gul-e-zebā.ī tak

raas aa.ī na jinheñ merī pazīrā.ī tak

haar kā sadma huā hai ki hai sāzish koī

ḳhush to thī ḳhuub mohabbat mirī paspā.ī tak

phir to mumkin hai ka.ī aur bhī ġham nikleñge

baat pahuñchegī agar dast-e-masīhā.ī tak

ishq to ishq hai mat tah meñ tum is kī utro

Dūbne vaale bhī pahuñche nahīñ gahrā.ī tak

ishq kī raah meñ kitnī hī lakīreñ khīñcho

aag pahuñchegī bahar-hāl tamannā.ī tak

ab ḳhudā jaane guzar jā.egī mujh par kyā kyā

vo mujhe chhoḌ gayā hai mirī tanhā.ī tak

tū kahāñ hadd-e-suḳhanvar kī hai zad meñ 'ārif'

sirf mahdūd hai tū qāfiya-paimā.ī tak

wo sanwarenge mujhe kya gul-e-zebai tak

ras aai na jinhen meri pazirai tak

haar ka sadma hua hai ki hai sazish koi

KHush to thi KHub mohabbat meri paspai tak

phir to mumkin hai kai aur bhi gham niklenge

baat pahunchegi agar dast-e-masihai tak

ishq to ishq hai mat tah mein tum is ki utro

Dubne wale bhi pahunche nahin gahrai tak

ishq ki rah mein kitni hi lakiren khincho

aag pahunchegi bahar-haal tamannai tak

ab KHuda jaane guzar jaegi mujh par kya kya

wo mujhe chhoD gaya hai meri tanhai tak

tu kahan hadd-e-suKHanwar ki hai zad mein 'arif'

sirf mahdud hai tu qafiya-paimai tak