wo shaKHs jo hai mere waste adu ki tarah

vo shaḳhs jo hai mire vāste adū kī tarah

ragoñ meñ dauḌtā phirtā hai kyoñ lahū kī tarah

gavāh haiñ mire ghar kī tamām dīvāreñ

ki terī yaad ko rakkhā hai aabrū kī tarah

simaT sako to simaT kar gulāb ban jaao

bikhar sako to bikhar jaao rang-o-bū kī tarah

uThā thā sūrat-e-fariyād sub.h-dam ai dost

miTā huuñ shaam ko muflis kī aarzū kī tarah

'naresh' bāñdh ke rakkhegā mujh ko kaun ki maiñ

bikhar chukā huuñ fazāoñ meñ guftugū kī tarah

wo shaKHs jo hai mere waste adu ki tarah

ragon mein dauDta phirta hai kyon lahu ki tarah

gawah hain mere ghar ki tamam diwaren

ki teri yaad ko rakkha hai aabru ki tarah

simaT sako to simaT kar gulab ban jao

bikhar sako to bikhar jao rang-o-bu ki tarah

uTha tha surat-e-fariyaad subh-dam ai dost

miTa hun sham ko muflis ki aarzu ki tarah

'naresh' bandh ke rakkhega mujh ko kaun ki main

bikhar chuka hun fazaon mein guftugu ki tarah