wo shaKHs koi jis ka sahaara nahin hota

vo shaḳhs koī jis kā sahārā nahīñ hotā

zinda to nazar aatā hai zinda nahīñ hotā

har aadmī rakhtā nahīñ zaḳhmoñ ko chhupā kar

har shaḳhs ko jiine kā salīqa nahīñ hotā

is daur-e-pur-āshob kī pahchān yahī hai

tanhā.ī meñ bhī aadmī tanhā nahīñ hotā

hotī hai tamanna to nihāñ dil meñ hamāre

hoñToñ pe magar harf-e-tamannā nahīñ hotā

vo to ye kaho rāhateñ marbūt haiñ bāham

varna koī duniyā meñ kisī kā nahīñ hotā

'usrat to añdhere ko basā letī hai ghar meñ

daulat ke binā ghar meñ ujālā nahīñ hotā

ye sach hai koī shauq panaptā nahīñ 'nazmī'

māhaul agar hausla-afzā nahīñ hotā

wo shaKHs koi jis ka sahaara nahin hota

zinda to nazar aata hai zinda nahin hota

har aadmi rakhta nahin zaKHmon ko chhupa kar

har shaKHs ko jine ka saliqa nahin hota

is daur-e-pur-ashob ki pahchan yahi hai

tanhai mein bhi aadmi tanha nahin hota

hoti hai tamanna to nihan dil mein hamare

honTon pe magar harf-e-tamanna nahin hota

wo to ye kaho rahaten marbut hain baham

warna koi duniya mein kisi ka nahin hota

'usrat to andhere ko basa leti hai ghar mein

daulat ke bina ghar mein ujala nahin hota

ye sach hai koi shauq panapta nahin 'nazmi'

mahaul agar hausla-afza nahin hota