wo sone chandi na shishe ke ghar mein rahta hai

vo sone chāñdī na shīshe ke ghar meñ rahtā hai

magar hamāre dil-e-mo'tabar meñ rahtā hai

maiñ ik faqīr huuñ aisā dar-e-saḳhāvat kā

amīr-e-shahr bhī mere asar meñ rahtā hai

nazar milāte nahīñ ham se chāñd aur sūraj

kisī kā nuur hamārī nazar meñ rahtā hai

kisī ko Thes bhī lagtī hai chīḳh uThte haiñ

jahāñ kā dard hamāre jigar meñ rahtā hai

hamāre ghar kā hī kirdār koī niklegā

jo āyatoñ ke bhī zer-o-zabar meñ rahtā hai

sarāpā nuur kā paikar hai jo vahī ḳhurshīd

ab intizār-e-tulūa-e-sahar meñ rahtā hai

tumhārī jiit takabbur kā be-yaqīñ paisa

kisī ġharīb ke dast-e-hunar meñ rahtā hai

laboñ pe jis ke zamānoñ kī pyaas hai raqsāñ

ajiib shaḳhs hai paanī ke ghar meñ rahtā hai

sunā hai maiñ ne vahāñ maut bhī nahīñ jaatī

koī ilāqa-e-ḳhairul-bashar meñ rahtā hai

samundaroñ kī jo bastī bahā ke le jaa.e

ki itnā paanī mirī chashm-e-tar meñ rahtā hai

tumhīñ batāo vahāñ phir sukūn kyoñ na mile

hamārā dil dil-e-ka.aba-basar meñ rahtā hai

na jaane kab kahāñ shamshīr ise banānā paḌe

mirā qalam mire raḳht-e-safar meñ rahtā hai

wo sone chandi na shishe ke ghar mein rahta hai

magar hamare dil-e-mo'tabar mein rahta hai

main ek faqir hun aisa dar-e-saKHawat ka

amir-e-shahr bhi mere asar mein rahta hai

nazar milate nahin hum se chand aur suraj

kisi ka nur hamari nazar mein rahta hai

kisi ko Thes bhi lagti hai chiKH uThte hain

jahan ka dard hamare jigar mein rahta hai

hamare ghar ka hi kirdar koi niklega

jo aayaton ke bhi zer-o-zabar mein rahta hai

sarapa nur ka paikar hai jo wahi KHurshid

ab intizar-e-tulua-e-sahar mein rahta hai

tumhaari jit takabbur ka be-yaqin paisa

kisi gharib ke dast-e-hunar mein rahta hai

labon pe jis ke zamanon ki pyas hai raqsan

ajib shaKHs hai pani ke ghar mein rahta hai

suna hai main ne wahan maut bhi nahin jati

koi ilaqa-e-KHairul-bashar mein rahta hai

samundaron ki jo basti baha ke le jae

ki itna pani meri chashm-e-tar mein rahta hai

tumhin batao wahan phir sukun kyon na mile

hamara dil dil-e-kaba-basar mein rahta hai

na jaane kab kahan shamshir ise banana paDe

mera qalam mere raKHt-e-safar mein rahta hai