wo taza rang-e-shafaq wo bahaar ki KHushbu

vo taaza rang-e-shafaq vo bahār kī ḳhushbū

vo kachchī galiyoñ meñ uḌte ġhubār kī ḳhushbū

vo TuuTī TuuTī sī chaukhaT vo ḳhasta ḳhasta kivāḌ

aur un meñ maazī ke lail-o-nahār kī ḳhushbū

vo gaate gaate se mausam vo dopahar kā sukūt

vo saada bādaloñ meñ sau siñgār kī ḳhushbū

tumhāre phuul se chehre kī jab banī tasvīr

ḳhizāñ ke daur meñ aa.ī bahār kī ḳhushbū

sabā guzartī huī aa.ī mere gaañv se kyā

kahāñ se laa.ī hai bele ke haar kī ḳhushbū

vo pyārī bāteñ laḌakpan kī vo baḌoñ kī hañsī

vo māmtā kī sugand aur pyaar kī ḳhushbū

chamakte shahr meñ yuuñ gaañv yaad aatā hai

ke jaise dasht meñ gesū-e-yār kī ḳhushbū

zamāna ho gayā garche vatan ko chhoḌe hue

maiñ aañkh mūñdūñ to aa.e hai pyaar kī ḳhushbū

vo oltī ke Tapakte hue sharāroñ meñ

hamāre sahn hī ke har siñgār kī ḳhushbū

ye merī ġhazloñ meñ jo rang iztirāb kā hai

isī se niklegī 'anjum' qarār kī ḳhushbū

wo taza rang-e-shafaq wo bahaar ki KHushbu

wo kachchi galiyon mein uDte ghubar ki KHushbu

wo TuTi TuTi si chaukhaT wo KHasta KHasta kiwaD

aur un mein mazi ke lail-o-nahaar ki KHushbu

wo gate gate se mausam wo dopahar ka sukut

wo sada baadalon mein sau singar ki KHushbu

tumhaare phul se chehre ki jab bani taswir

KHizan ke daur mein aai bahaar ki KHushbu

saba guzarti hui aai mere ganw se kya

kahan se lai hai bele ke haar ki KHushbu

wo pyari baaten laDakpan ki wo baDon ki hansi

wo mamta ki sugand aur pyar ki KHushbu

chamakte shahr mein yun ganw yaad aata hai

ke jaise dasht mein gesu-e-yar ki KHushbu

zamana ho gaya garche watan ko chhoDe hue

main aankh mundun to aae hai pyar ki KHushbu

wo olti ke Tapakte hue shararon mein

hamare sahn hi ke har singar ki KHushbu

ye meri ghazlon mein jo rang iztirab ka hai

isi se niklegi 'anjum' qarar ki KHushbu