wo tasawwur mein to aata hai chala jata hai

vo tasavvur meñ to aatā hai chalā jaatā hai

dhaḌkaneñ dil kī baḌhātā hai chalā jaatā hai

hone lagtā hai mujhe jab bhī takabbur kā gumāñ

koī ā.īna dikhātā hai chalā jaatā hai

koī darvesh mujhe roz savālī ban kar

ḳhvāb-e-ġhaflat se jagātā hai chalā jaatā hai

kaun hai dost yahāñ kaun hamārā dushman

gardish-e-vaqt batātā hai chalā jaatā hai

merī turbat pe sar-e-shām du'āoñ kā charāġh

koī ashkoñ se jalātā hai chalā jaatā hai

baiTh jaatā huuñ rah-e-'ishq meñ thak kar to junūñ

manzil-e-shauq baḌhātā hai chalā jaatā hai

vaqt aatā hai dabe paañv hamesha 'ālam'

sab kī auqāt batātā hai chalā jaatā hai

wo tasawwur mein to aata hai chala jata hai

dhaDkanen dil ki baDhata hai chala jata hai

hone lagta hai mujhe jab bhi takabbur ka guman

koi aaina dikhata hai chala jata hai

koi darwesh mujhe roz sawali ban kar

KHwab-e-ghaflat se jagata hai chala jata hai

kaun hai dost yahan kaun hamara dushman

gardish-e-waqt batata hai chala jata hai

meri turbat pe sar-e-sham du'aon ka charagh

koi ashkon se jalata hai chala jata hai

baiTh jata hun rah-e-'ishq mein thak kar to junun

manzil-e-shauq baDhata hai chala jata hai

waqt aata hai dabe panw hamesha 'alam'

sab ki auqat batata hai chala jata hai