wo to gaya ab apni ana ko sameT le

vo to gayā ab apnī anā ko sameT le

ai ġham-gusār dast-e-duā ko sameT le

bāloñ meñ apne Daal le ab ḳhāk-e-kū-e-yār

bāñhoñ meñ us galī kī havā ko sameT le

miTTī kī ik lakīr bhī kah degī dāstāñ

chalne kā shauq hai to ridā ko sameT le

in ābloñ kī raushnī bhaTkegī shahr meñ

ai kūcha-gard gardish-e-pā ko sameT le

lafzoñ ko tark kar de ki in ko nahīñ sabāt

āñkhoñ meñ aaj apnī vafā ko sameT le

bas ek chup hī tere laboñ par sajī rahe

bas apne dil meñ sail-e-balā ko sameT le

'ḳhālid' kabhī to tazkira-e-jāñ sunā hameñ

apnī sadā meñ ḳhauf-e-sadā ko sameT le

wo to gaya ab apni ana ko sameT le

ai gham-gusar dast-e-dua ko sameT le

baalon mein apne Dal le ab KHak-e-ku-e-yar

banhon mein us gali ki hawa ko sameT le

miTTi ki ek lakir bhi kah degi dastan

chalne ka shauq hai to rida ko sameT le

in aablon ki raushni bhaTkegi shahr mein

ai kucha-gard gardish-e-pa ko sameT le

lafzon ko tark kar de ki in ko nahin sabaat

aankhon mein aaj apni wafa ko sameT le

bas ek chup hi tere labon par saji rahe

bas apne dil mein sail-e-bala ko sameT le

'KHalid' kabhi to tazkira-e-jaan suna hamein

apni sada mein KHauf-e-sada ko sameT le