wo zimmedari kitni KHushi se nibhai thi

vo zimmedārī kitnī ḳhushī se nibhā.ī thī

us ko sarā.ī kī zabāñ maiñ ne sikhā.ī thī

maiñ ne jahāñ pe pyaas ko sairāb kar diyā

dariyā kī ek lahr mire haath aa.ī thī

jañg-e-arab meñ chhoḌ ga.e jab himāyatī

kuufa ke ik javāñ ne mirī jaañ bachā.ī thī

aurat se bahs karnā samajhtā thā bas hatak

aur nazriyātī laḌkī bhī dil meñ basā.ī thī

īmān kā hisāb bhī rakhnā paḌā hameñ

zaatī bhalā.ī meñ hī ḳhudā kī bhalā.ī thī

vaadī meñ har-sū ugne lage pāniyoñ ke phuul

chashme pe koī husn-bharī aa nahā.ī thī

maiñ ne chune haiñ apnī hī marzī ke chand phuul

varna to mere hisse meñ puurī ḳhudā.ī thī

shāyad ki ek raat ke ba.ad aur raat ho

sapne meñ ik judā.ī ke ba.ad aur judā.ī thī

wo zimmedari kitni KHushi se nibhai thi

us ko sarai ki zaban main ne sikhai thi

main ne jahan pe pyas ko sairab kar diya

dariya ki ek lahr mere hath aai thi

jang-e-arab mein chhoD gae jab himayati

kufa ke ek jawan ne meri jaan bachai thi

aurat se bahs karna samajhta tha bas hatak

aur nazriyati laDki bhi dil mein basai thi

iman ka hisab bhi rakhna paDa hamein

zati bhalai mein hi KHuda ki bhalai thi

wadi mein har-su ugne lage paniyon ke phul

chashme pe koi husn-bhari aa nahai thi

main ne chune hain apni hi marzi ke chand phul

warna to mere hisse mein puri KHudai thi

shayad ki ek raat ke baad aur raat ho

sapne mein ek judai ke baad aur judai thi