wo zindagi mere nazdik zindagi na hui

vo zindagī mire nazdīk zindagī na huī

tamām umr mayassar jise ḳhushī na huī

havas-parast nigāhoñ ne chashm-e-sāqī se

hazār jaam piye duur tishnagī na huī

dikhā.e ahl-e-siyāsat ne sabz baaġh magar

ḳhizāñ nasīb bahāroñ meñ tāzgī na huī

havā ke ruḳh ko jo pahchānñe se qāsir ho

mire ḳhayāl meñ vo chashm-e-āgahī na huī

zamāna laakh muḳhālif rahā ba-faiz-e-talab

hamāre zauq-e-tajassus meñ kuchh kamī na huī

adū se tū ne ta.āvun to kar liyā lekin

kabhī junūñ se ḳhirad terī dostī na huī

jo bāñTtā thā zamāne ko raushnī kal tak

usī ke ghar meñ 'sahar' aaj raushnī na huī

wo zindagi mere nazdik zindagi na hui

tamam umr mayassar jise KHushi na hui

hawas-parast nigahon ne chashm-e-saqi se

hazar jam piye dur tishnagi na hui

dikhae ahl-e-siyasat ne sabz bagh magar

KHizan nasib bahaaron mein tazgi na hui

hawa ke ruKH ko jo pahchanne se qasir ho

mere KHayal mein wo chashm-e-agahi na hui

zamana lakh muKHalif raha ba-faiz-e-talab

hamare zauq-e-tajassus mein kuchh kami na hui

adu se tu ne taawun to kar liya lekin

kabhi junun se KHirad teri dosti na hui

jo banTta tha zamane ko raushni kal tak

usi ke ghar mein 'sahar' aaj raushni na hui