wo zulm to karte hain saza se nahin Darte

vo zulm to karte haiñ sazā se nahīñ Darte

is daur ke insān ḳhudā se nahīñ Darte

aise bhī haiñ kuchh log jo daulat ke nashe meñ

mazlūm kī aahoñ se duā se nahīñ Darte

har haal meñ jiine kī qasam khaa.ī hai ham ne

ham ahl-e-mohabbat haiñ jafā se nahīñ Darte

ham zahr bhī pī leñge baḌe shauq se lekin

Darte haiñ masīhā se davā se nahīñ Darte

mar kar bhī dikhā deñge tire chāhne vaale

haiñ tālib-e-dīdār fanā se nahīñ Darte

har haal meñ manzil pe nazar hotī hai jinkī

rāhoñ meñ kabhī rāh-numā se nahīñ Darte

is daur meñ jiinā koī āsāñ nahīñ 'sāgar'

har roz jo marte haiñ kazā se nahīñ Darte

wo zulm to karte hain saza se nahin Darte

is daur ke insan KHuda se nahin Darte

aise bhi hain kuchh log jo daulat ke nashe mein

mazlum ki aahon se dua se nahin Darte

har haal mein jine ki qasam khai hai hum ne

hum ahl-e-mohabbat hain jafa se nahin Darte

hum zahr bhi pi lenge baDe shauq se lekin

Darte hain masiha se dawa se nahin Darte

mar kar bhi dikha denge tere chahne wale

hain talib-e-didar fana se nahin Darte

har haal mein manzil pe nazar hoti hai jinki

rahon mein kabhi rah-numa se nahin Darte

is daur mein jina koi aasan nahin 'sagar'

har roz jo marte hain kaza se nahin Darte