ya mila qaum ko KHud apna nigahban ho kar

yā milā qaum ko ḳhud apnā nigahbāñ ho kar

sau tarah dekh liyā ham ne pareshāñ ho kar

kāfir-e-ishq hī achchhe the sanam-ḳhānoñ meñ

shān-e-īmāñ na milī sāhab-e-īmāñ ho kar

naqs-e-tanzīm se ho tark-e-chaman kyā ma.anī

ham ko rahnā hai yahīñ tār-e-rag-e-jāñ ho kar

kyā huā gar koī hindū ki musalmāñ Thahrā

ādamiyat kā nahīñ paas jo insāñ ho kar

ham bujheñ bhī to bujheñ misl-e-charāġh-e-saharī

aur jo raushan hoñ to hoñ sham-e-shabistāñ ho kar

dil meñ ahbāb ke ham ban ke asar baiTheñge

aur uTheñge isī gulshan se bahārāñ ho kar

kyā gulistāñ meñ nayā hukm-e-zabāñ-bandī hai

bāġhbāñ bhī huā sayyād-e-nigahbāñ ho kar

sidq niyyat se agar us kī chaman-bandī ho

phir rahe kyuuñ na vatan mulk-e-sulemāñ ho kar

ab ham apne liye ḳhud sūd-o-ziyāñ socheñge

ham ko jiinā hī nahīñ banda-e-ehsāñ ho kar

rashk-e-gulzār-e-iram arz-e-vatan jab hogī

apne begāne baseñ sumbul-o-raihāñ ho kar

ya mila qaum ko KHud apna nigahban ho kar

sau tarah dekh liya hum ne pareshan ho kar

kafir-e-ishq hi achchhe the sanam-KHanon mein

shan-e-iman na mili sahab-e-iman ho kar

naqs-e-tanzim se ho tark-e-chaman kya mani

hum ko rahna hai yahin tar-e-rag-e-jaan ho kar

kya hua gar koi hindu ki musalman Thahra

aadamiyat ka nahin pas jo insan ho kar

hum bujhen bhi to bujhen misl-e-charagh-e-sahari

aur jo raushan hon to hon sham-e-shabistan ho kar

dil mein ahbab ke hum ban ke asar baiThenge

aur uThenge isi gulshan se bahaaran ho kar

kya gulistan mein naya hukm-e-zaban-bandi hai

baghban bhi hua sayyaad-e-nigahban ho kar

sidq niyyat se agar us ki chaman-bandi ho

phir rahe kyun na watan mulk-e-suleman ho kar

ab hum apne liye KHud sud-o-ziyan sochenge

hum ko jina hi nahin banda-e-ehsan ho kar

rashk-e-gulzar-e-iram arz-e-watan jab hogi

apne begane basen sumbul-o-raihan ho kar