yaad aai ek bhuli hui baat der tak

yaad aa.ī ek bhūlī huī baat der tak

dil kā 'ajīb haal rahā raat der tak

tanhā paḌe taḌapnā vo ik kunj-e-dard meñ

piinā vo zahr-e-talḳhī-e-lamhāt der tak

mumkin na thī jo baat vahī baat sochnā

jalnā ba-soz-e-shauq-e-mulāqāt der tak

iz.hār-e-karb-e-zīst ke pairā.e DhūñDhnā

karnā raqam ḳharābī-e-hālāt der tak

rakhnā vo ik ḳhayāl kā sahrā-e-jabr meñ

āvāra-e-sarāb-e-munājāt der tak

koī 'ajab tarah ke vo din the ġharaz 'bashīr'

kī hai 'ajab tarah basar-auqāt der tak

yaad aai ek bhuli hui baat der tak

dil ka 'ajib haal raha raat der tak

tanha paDe taDapna wo ek kunj-e-dard mein

pina wo zahr-e-talKHi-e-lamhat der tak

mumkin na thi jo baat wahi baat sochna

jalna ba-soz-e-shauq-e-mulaqat der tak

izhaar-e-karb-e-zist ke pairae DhunDhna

karna raqam KHarabi-e-haalat der tak

rakhna wo ek KHayal ka sahra-e-jabr mein

aawara-e-sarab-e-munajat der tak

koi 'ajab tarah ke wo din the gharaz 'bashir'

ki hai 'ajab tarah basar-auqat der tak