yaad aata hai ki KHud ko naujawan samjha tha main

yaad aatā hai ki ḳhud ko naujavāñ samjhā thā maiñ

is tilism-e-rang-o-bū ko gulsitāñ samjhā thā maiñ

haañ use faḳhr-e-hasīnān-e-jahāñ samjhā thā maiñ

us kā milnā hāsil-e-kaun-o-makāñ samjhā thā maiñ

us sanam ko ḳhud pe jab tak mehrbāñ samjhā thā maiñ

us ke atvār-e-sitam ko shoḳhiyāñ samjhā thā maiñ

un kī nazroñ meñ nihāñ jo bijliyāñ samjhā thā maiñ

har adā ko iltifāt-e-be-karāñ samjhā thā maiñ

mere chehre se numāyāñ thā fishār-e-zabt-e-ġham

aah ko bhī shikva-e-jaur-e-butāñ samjhā thā maiñ

rafta rafta us ne baḌh kar mere dil ko ḳhuuñ kiyā

jis ḳhalish meñ lazzat-e-paiham nihāñ samjhā thā maiñ

husn-e-fānī gar nahīñ ishq-e-majāzī bhī nahīñ

chand-roza shai thī jis ko jāvedāñ samjhā thā

dā.imī furqat ne 'āġhā' merī āñkheñ khol diiñ

ik jahannum hai jise bāġh-e-jināñ samjhā thā maiñ

yaad aata hai ki KHud ko naujawan samjha tha main

is tilism-e-rang-o-bu ko gulsitan samjha tha main

han use faKHr-e-hasinan-e-jahan samjha tha main

us ka milna hasil-e-kaun-o-makan samjha tha main

us sanam ko KHud pe jab tak mehrban samjha tha main

us ke atwar-e-sitam ko shoKHiyan samjha tha main

un ki nazron mein nihan jo bijliyan samjha tha main

har ada ko iltifat-e-be-karan samjha tha main

mere chehre se numayan tha fishaar-e-zabt-e-gham

aah ko bhi shikwa-e-jaur-e-butan samjha tha main

rafta rafta us ne baDh kar mere dil ko KHun kiya

jis KHalish mein lazzat-e-paiham nihan samjha tha main

husn-e-fani gar nahin ishq-e-majazi bhi nahin

chand-roza shai thi jis ko jawedan samjha tha

daimi furqat ne 'agha' meri aankhen khol din

ek jahannum hai jise bagh-e-jinan samjha tha main