yaad aisa koi aaya hai ki ji jaanta hai

yaad aisā koī aaya hai ki jī jāntā hai

is qadar dil ko dukhāyā hai ki jī jāntā hai

ishq yuuñ jaan ko aaya hai ki jī jāntā hai

roz-o-shab aisā rulāyā hai ki jī jāntā hai

kyā mohabbat bhī koī jurm hai is duniyā ne

aisā hangāma uThāyā hai ki jī jāntā hai

ho sakegā na masīhā se bhī is dil kā ilaaj

zaḳhm vo us ne lagāyā hai ki jī jāntā hai

vo mujhe bhuul bhī saktā hai ye ummīd na thī

is tarah us ne bhulāyā hai ki jī jāntā hai

dil hai qaabū meñ na maiñ apne hī bas meñ huuñ 'payām'

aisā dīvāna banāyā hai ki jī jāntā hai

yaad aisa koi aaya hai ki ji jaanta hai

is qadar dil ko dukhaya hai ki ji jaanta hai

ishq yun jaan ko aaya hai ki ji jaanta hai

roz-o-shab aisa rulaya hai ki ji jaanta hai

kya mohabbat bhi koi jurm hai is duniya ne

aisa hangama uThaya hai ki ji jaanta hai

ho sakega na masiha se bhi is dil ka ilaj

zaKHm wo us ne lagaya hai ki ji jaanta hai

wo mujhe bhul bhi sakta hai ye ummid na thi

is tarah us ne bhulaya hai ki ji jaanta hai

dil hai qabu mein na main apne hi bas mein hun 'payam'

aisa diwana banaya hai ki ji jaanta hai