yaad ayyam-e-rafta yun aae

yaad ayyām-e-rafta yuuñ aa.e

dhuñdle dhuñdle se jaise kuchh saa.e

jaise uḌte hue parinde kā

naġhma dam bhar fazā meñ lahrā.e

jaise vīrān dil ke gulshan meñ

chupke chupke bahār aa jaa.e

suunī suunī sī jaise mahfil meñ

daf.atan jān-e-intizār aa.e

jaise abr-e-siyah ke parde meñ

chāñd kī ik kiran thirak jaa.e

jaise sunsān rahguzāroñ meñ

yak-ba-yak ik charāġh jal jaa.e

yā koī riñd-e-tishna-lab jaise

dast-e-sāqī se jaam pā jaa.e

jaise mahjūr ek ġhazal gā kar

apne ġhamgīn dil ko bahlā.e

jaise tārīk shab kā sannāTā

naġhma-e-lai se TūTtā jaa.e

ek tūfāñ-zada musāfir ke

jaise sāhil qarīb aa jaa.e

jaise tapte se regzāroñ meñ

abr-e-rahmat zarā baras jaa.e

jaise pahlī kiran savere kī

rauzan-e-shab se jhāñktī jaa.e

jaise bād-e-sabā ke jhoñkoñ se

ġham ke māroñ ko niiñd aa jaa.e

jaise ġhurbat meñ bhaTke raahī ko

ik payām-e-'habīb' aa jaa.e

yaad ayyam-e-rafta yun aae

dhundle dhundle se jaise kuchh sae

jaise uDte hue parinde ka

naghma dam bhar faza mein lahrae

jaise viran dil ke gulshan mein

chupke chupke bahaar aa jae

suni suni si jaise mahfil mein

dafatan jaan-e-intizar aae

jaise abr-e-siyah ke parde mein

chand ki ek kiran thirak jae

jaise sunsan rahguzaron mein

yak-ba-yak ek charagh jal jae

ya koi rind-e-tishna-lab jaise

dast-e-saqi se jam pa jae

jaise mahjur ek ghazal ga kar

apne ghamgin dil ko bahlae

jaise tarik shab ka sannaTa

naghma-e-lai se TuTta jae

ek tufan-zada musafir ke

jaise sahil qarib aa jae

jaise tapte se regzaron mein

abr-e-rahmat zara baras jae

jaise pahli kiran sawere ki

rauzan-e-shab se jhankti jae

jaise baad-e-saba ke jhonkon se

gham ke maron ko nind aa jae

jaise ghurbat mein bhaTke rahi ko

ek payam-e-'habib' aa jae