yaad ayyame ki dil rakhte the jaan rakhte the hum

yaad ayyāme ki dil rakhte the jaañ rakhte the ham

shikva-sanjī ke liye muñh meñ zabāñ rakhte the ham

sāz-e-ġham rakhte the ham soz-e-nihāñ rakhte the ham

sar meñ saudā dil meñ nashtar sā nihāñ rakhte the ham

gard-bād āsāz meñ bar āsmāñ rakhte the ham

apne qadmoñ ke tale saarā jahāñ rakhte the ham

hasrat-e-āshuftagī shauq-e-ziyāñ rakhte the ham

rauzan-e-ummīd-o-bīm-e-pāsbāñ rakhte the ham

fursat-e-be-sūd sa.ī-e-rā.igāñ rakhte the ham

thā duāoñ se pare vo āstāñ rakhte the ham

parda-e-jāñ meñ nigār-e-dil-sitāñ rakhte the ham

gulshan-e-dil meñ bahār-e-be-ḳhizāñ rakhte the ham

kunj-e-uzlat meñ sarishk-e-ḳhūñ ravāñ rakhte the ham

rāz-dāroñ se bhī ik rāz-e-nihāñ rakhte the ham

shab hama shab khelte the halqa-hā-e-zulf se

dīda-e-ġhammāz ko ham dāstāñ rakhte the ham

Thes pahuñchāte the pindār-e-ḳhudī ko rāt-din

phir bhī dil kī ārzūoñ ko javāñ rakhte the ham

ab na vo dil hai na vo saudā na vo tuġhyān-e-shauq

yaad ayyāme ki dil vaqf-e-fuġhāñ rakhte the ham

yaad ayyame ki dil rakhte the jaan rakhte the hum

shikwa-sanji ke liye munh mein zaban rakhte the hum

saz-e-gham rakhte the hum soz-e-nihan rakhte the hum

sar mein sauda dil mein nashtar sa nihan rakhte the hum

gard-baad aasaz mein bar aasman rakhte the hum

apne qadmon ke tale sara jahan rakhte the hum

hasrat-e-ashuftagi shauq-e-ziyan rakhte the hum

rauzan-e-ummid-o-bim-e-pasban rakhte the hum

fursat-e-be-sud sai-e-raigan rakhte the hum

tha duaon se pare wo aastan rakhte the hum

parda-e-jaan mein nigar-e-dil-sitan rakhte the hum

gulshan-e-dil mein bahaar-e-be-KHizan rakhte the hum

kunj-e-uzlat mein sarishk-e-KHun rawan rakhte the hum

raaz-daron se bhi ek raaz-e-nihan rakhte the hum

shab hama shab khelte the halqa-ha-e-zulf se

dida-e-ghammaz ko hum dastan rakhte the hum

Thes pahunchate the pindar-e-KHudi ko raat-din

phir bhi dil ki aarzuon ko jawan rakhte the hum

ab na wo dil hai na wo sauda na wo tughyan-e-shauq

yaad ayyame ki dil waqf-e-fughan rakhte the hum