yaad hai pir-e-mughan ki chashm-e-nurani mujhe

yaad hai pīr-e-muġhāñ kī chashm-e-nūrānī mujhe

ik nazar meñ mil ga.ī aalam kī sultānī mujhe

lamha lamha luT gayā sarmāya-e-fursat mirā

kar ga.ī muflis irādoñ kī farāvānī mujhe

zaat ke hujre meñ baiThā sochtā rahtā huuñ maiñ

tā-ba-kai ābād rakkhegī ye vīrānī mujhe

faash kar duuñ ahl-e-mahfil par rumūz-e-husn-e-dost

āgahī baḳhshe agar taufīq-e-nādānī mujhe

dosh par kartā huuñ is ke ālam-e-imkāñ kī sair

jazba-e-taḳh.īl hai taḳht-e-sulaimānī mujhe

dil nahīñ ik tā.ir-e-vahshī hai siine meñ asiir

raat bhar bedār rakhtā hai ye zindānī mujhe

yaad hai pir-e-mughan ki chashm-e-nurani mujhe

ek nazar mein mil gai aalam ki sultani mujhe

lamha lamha luT gaya sarmaya-e-fursat mera

kar gai muflis iradon ki farawani mujhe

zat ke hujre mein baiTha sochta rahta hun main

ta-ba-kai aabaad rakkhegi ye virani mujhe

fash kar dun ahl-e-mahfil par rumuz-e-husn-e-dost

aagahi baKHshe agar taufiq-e-nadani mujhe

dosh par karta hun is ke aalam-e-imkan ki sair

jazba-e-taḳhil hai taKHt-e-sulaimani mujhe

dil nahin ek tair-e-wahshi hai sine mein asir

raat bhar bedar rakhta hai ye zindani mujhe