yaad hai roz-e-azal usne kaha kya kya kuchh

yaad hai roz-e-azal us ne kahā kyā kyā kuchh

bar-ḳhilāf is ke yahāñ tū ne kiyā kyā kyā kuchh

huur dī ḳhuld diyā qasr diyā rahne ko

mujh gunahgār ko ḳhāliq ne diyā kyā kyā kuchh

sāl-hā-sāl bahār-e-chaman-e-ālam ne

rañg dikhlā.e haiñ ham ko ba-ḳhudā kyā kyā kuchh

gah ḳhizāñ aa.ī gulistāñ meñ kabhī bād-e-bahār

sāmne āñkhoñ ke bande ke huā kyā kyā kuchh

tohmat-e-jurm-o-jafā hirs-o-havā ġhaflat-e-dil

ham ne bāzār se hastī ke liyā kyā kyā kuchh

āsmān mehr-e-falak rū-e-zamīñ arsh-e-barīñ

peshtar is se ḳhudā jaane huā kyā kyā kuchh

bāb-e-firduas o dar-e-rauza-e-rizvāñ zāhid

band in āñkhoñ ke hote hī khulā kyā kyā kuchh

naza.a ke vaqt maiñ pūchhūñgā kisī mun.im se

saath kyā apne liyā aur rahā kyā kyā kuchh

vaqt-e-dil jaane ke hargiz na ḳhabar-dār kiyā

ab samjhātī hai ye fikr-e-rasā kyā kyā kuchh

shiddat-e-ranj-o-alam sadma-e-dil soz-e-jigar

furqat-e-yār meñ mujh par na huā kyā kyā kuchh

dair ko puujā haram ko kiye gaahe sajde

kar liyā ziist meñ bejā-o-bajā kyā kyā kuchh

jo talāfī na ho mahshar meñ ajab hai us kā

ḳhud haiñ ma.aqūl ki yaañ ham ne kiyā kyā kyā kuchh

gosh par jaam ke muñh raat ko rakh kar apnā

kis ko ma.alūm hai shīshe ne kahā kyā kyā kuchh

dāġh-e-dil ḳhūn-e-jigar ātish-e-ġham dard-e-firāq

ham ko bhī ishq kī daulat se milā kyā kyā kuchh

'muntahī' zor-e-badan quvvat-e-dil chālākī

ek aane se za.īfī ke gayā kyā kyā kuchh

yaad hai roz-e-azal us ne kaha kya kya kuchh

bar-KHilaf is ke yahan tu ne kiya kya kya kuchh

hur di KHuld diya qasr diya rahne ko

mujh gunahgar ko KHaliq ne diya kya kya kuchh

sal-ha-sal bahaar-e-chaman-e-alam ne

rang dikhlae hain hum ko ba-KHuda kya kya kuchh

gah KHizan aai gulistan mein kabhi baad-e-bahaar

samne aankhon ke bande ke hua kya kya kuchh

tohmat-e-jurm-o-jafa hirs-o-hawa ghaflat-e-dil

hum ne bazar se hasti ke liya kya kya kuchh

aasman mehr-e-falak ru-e-zamin arsh-e-barin

peshtar is se KHuda jaane hua kya kya kuchh

bab-e-firduas o dar-e-rauza-e-rizwan zahid

band in aankhon ke hote hi khula kya kya kuchh

naza ke waqt main puchhunga kisi munim se

sath kya apne liya aur raha kya kya kuchh

waqt-e-dil jaane ke hargiz na KHabar-dar kiya

ab samjhati hai ye fikr-e-rasa kya kya kuchh

shiddat-e-ranj-o-alam sadma-e-dil soz-e-jigar

furqat-e-yar mein mujh par na hua kya kya kuchh

dair ko puja haram ko kiye gahe sajde

kar liya zist mein beja-o-baja kya kya kuchh

jo talafi na ho mahshar mein ajab hai us ka

KHud hain maqul ki yan hum ne kiya kya kya kuchh

gosh par jam ke munh raat ko rakh kar apna

kis ko malum hai shishe ne kaha kya kya kuchh

dagh-e-dil KHun-e-jigar aatish-e-gham dard-e-firaq

hum ko bhi ishq ki daulat se mila kya kya kuchh

'muntahi' zor-e-badan quwwat-e-dil chaalaki

ek aane se zaifi ke gaya kya kya kuchh