yaad ka rog mat laga pyare

yaad kā rog mat lagā pyāre

ahd-e-māzī ko bhuul jā pyāre

jī bahaltā nahīñ tasavvur se

tū kabhī sāmne bhī aa pyāre

naam ke rah ga.e haiñ duniyā meñ

dost ahbāb aqrabā pyāre

ye bhī ik tarz-e-ġham-gusārī hai

tū mirā hausla baḌhā pyāre

shīsha-e-dil ko toḌne vaale

tū ne achchhā nahīñ kiyā pyāre

jazba-e-shauq mar na jaa.e kahīñ

ehtiyātan hī ruuTh jā pyāre

peḌ se gir ke zard pattoñ ne

bhar diyā farsh kā ḳhalā pyāre

terā ġham bhī ġham-e-zamāna bhī

ġham bhī ḳhālis nahīñ rahā pyāre

aas ke diip to jalā 'nusrat'

shaam kā vaqt ho chalā pyāre

yaad ka rog mat laga pyare

ahd-e-mazi ko bhul ja pyare

ji bahalta nahin tasawwur se

tu kabhi samne bhi aa pyare

nam ke rah gae hain duniya mein

dost ahbab aqraba pyare

ye bhi ek tarz-e-gham-gusari hai

tu mera hausla baDha pyare

shisha-e-dil ko toDne wale

tu ne achchha nahin kiya pyare

jazba-e-shauq mar na jae kahin

ehtiyatan hi ruTh ja pyare

peD se gir ke zard patton ne

bhar diya farsh ka KHala pyare

tera gham bhi gham-e-zamana bhi

gham bhi KHalis nahin raha pyare

aas ke dip to jala 'nusrat'

sham ka waqt ho chala pyare