yaad ki subh Dhal gai shauq ki sham ho gai

yaad kī sub.h Dhal ga.ī shauq kī shaam ho ga.ī

aap ke intizār meñ umr tamām ho ga.ī

pī hai jo ek buuñd bhī jaag paḌī hai zindagī

aisī sharāb-e-jāñ-fazā kaise harām ho ga.ī

saath kisī ne chhoḌ kar toḌ diyā kisī kā dil

chal to paḌā thā kārvāñ raah meñ shaam ho ga.ī

nikle ba-yād-e-mai-kada tāroñ ke saath saath ham

jaam tak aa ke zindagī māh-e-tamām ho ga.ī

raas na aa.ī ziist ko sub.h-e-bahār kī havā

ahl-e-junūñ kī anjuman ḳhalvat-e-jām ho ga.ī

aaj vo muskurā diye aaj hamārī zindagī

aag se phuul ban ga.ī phuul se jaam ho ga.ī

bazm se be-zabāñ uThe raah meñ guftugū na kī

kaise hamārī dāstāñ shahr meñ aam ho ga.ī

raat kī jashn-gāh par os paḌī hai niind kī

bād-e-sahar na jaane kyuuñ mahv-e-ḳhirām ho ga.ī

sun lī zabān-e-ḳhalq se ham ne ġhazal 'shamīm' kī

kaun sī ḳhaas baat hai kis liye aam ho ga.ī

yaad ki subh Dhal gai shauq ki sham ho gai

aap ke intizar mein umr tamam ho gai

pi hai jo ek bund bhi jag paDi hai zindagi

aisi sharab-e-jaan-faza kaise haram ho gai

sath kisi ne chhoD kar toD diya kisi ka dil

chal to paDa tha karwan rah mein sham ho gai

nikle ba-yaad-e-mai-kada taron ke sath sath hum

jam tak aa ke zindagi mah-e-tamam ho gai

ras na aai zist ko subh-e-bahaar ki hawa

ahl-e-junun ki anjuman KHalwat-e-jam ho gai

aaj wo muskura diye aaj hamari zindagi

aag se phul ban gai phul se jam ho gai

bazm se be-zaban uThe rah mein guftugu na ki

kaise hamari dastan shahr mein aam ho gai

raat ki jashn-gah par os paDi hai nind ki

baad-e-sahar na jaane kyun mahw-e-KHiram ho gai

sun li zaban-e-KHalq se hum ne ghazal 'shamim' ki

kaun si KHas baat hai kis liye aam ho gai