yaad par ungliyan uThati hun

yaad par uñgliyāñ uThātī huuñ

ḳhvāb par tohmateñ lagātī huuñ

kyā kahā dasht kā irāda hai

to chalo saath maiñ bhī aatī huuñ

vo jo mujh se kabhī milā hī nahīñ

maiñ use raat din satātī huuñ

us ko rakkhā hai fikr se āzād

ḳhud pe pābandiyāñ lagātī huuñ

nā kahīñ ḳhvāb jaan jaa.eñ mirā

phuul se titliyāñ uḌātī huuñ

dar kā dastak ke saath rishta hai

is liye roz khaTkhaTātī huuñ

maiñ tirā ḳhvāb dekhne ke liye

niiñd kī raushnī banātī huuñ

aañkh ko ḳhushk kar liyā maiñ ne

ḳhvāb sailāb meñ bahātī huuñ

yaad par ungliyan uThati hun

KHwab par tohmaten lagati hun

kya kaha dasht ka irada hai

to chalo sath main bhi aati hun

wo jo mujh se kabhi mila hi nahin

main use raat din satati hun

us ko rakkha hai fikr se aazad

KHud pe pabandiyan lagati hun

na kahin KHwab jaan jaen mera

phul se titliyan uDati hun

dar ka dastak ke sath rishta hai

is liye roz khaTkhaTati hun

main tera KHwab dekhne ke liye

nind ki raushni banati hun

aankh ko KHushk kar liya main ne

KHwab sailab mein bahati hun