yaadon ki diwar giraata rahta hun

yādoñ kī dīvār girātā rahtā huuñ

maiñ paanī se aañkh bachātā rahtā huuñ

sāhil pe kuchh der akele hotā huuñ

phir dariyā se haath milātā rahtā huuñ

yādoñ kī barsāt to hotī rahtī hai

maiñ āñkhoñ se ḳhvāb girātā rahtā huuñ

'sāhir' kī har nazm sunā kar majnūñ ko

maiñ sahrā kā dard baḌhātā rahtā huuñ

duniyā vaale mujh ko pāgal kahte haiñ

maiñ sūraj se aañkh milātā rahtā huuñ

patthar-vatthar mujh se nafrat karte haiñ

maiñ andhoñ ko raah dikhātā rahtā huuñ

mere pīchhe qais kī āñkheñ paḌ ga.ī haiñ

dariyā dariyā pyaas bujhātā rahtā huuñ

mujh ko dasht-e-sukūt sadā.eñ detā hai

sahrā sahrā ḳhaak uḌātā rahtā huuñ

mujh ko mere naam se jaanā jaatā hai

maiñ 'rizvī' kā Dhoñg rachātā rahtā huuñ

yaadon ki diwar giraata rahta hun

main pani se aankh bachata rahta hun

sahil pe kuchh der akele hota hun

phir dariya se hath milata rahta hun

yaadon ki barsat to hoti rahti hai

main aankhon se KHwab giraata rahta hun

'sahir' ki har nazm suna kar majnun ko

main sahra ka dard baDhata rahta hun

duniya wale mujh ko pagal kahte hain

main suraj se aankh milata rahta hun

patthar-watthar mujh se nafrat karte hain

main andhon ko rah dikhata rahta hun

mere pichhe qais ki aankhen paD gai hain

dariya dariya pyas bujhata rahta hun

mujh ko dasht-e-sukut sadaen deta hai

sahra sahra KHak uData rahta hun

mujh ko mere nam se jaana jata hai

main 'rizwi' ka Dhong rachata rahta hun