yar hai aaina hai shana hai

yaar hai aa.ina hai shāna hai

chashm-e-bad-dūr kyā zamāna hai

jhāñkne tākne kā vaqt gayā

ab vo ham haiñ na vo zamāna hai

vahshat-añgez hai nasīm-e-bahār

kyā junūñ-ḳhez ye zamāna hai

sāqiyā arsh par hai apnā dimāġh

sar hai aur terā āstāna hai

dāġh-e-hasrat se dil ho mālāmāl

yahī daulat yahī ḳhazāna hai

mahsharistān-e-ārzū-e-visāl

dil hai kyā ek kār-ḳhāna hai

lo bujhā chāhtā hai dil kā kañval

ḳhatm ab ishq kā fasāna hai

kyā kahīñ uḌ ke jā nahīñ sakte

vo chaman hai vo āshiyāna hai

'yās' ab aap meñ na ā.eñge

vasl ik maut kā bahāna hai

yar hai aaina hai shana hai

chashm-e-bad-dur kya zamana hai

jhankne takne ka waqt gaya

ab wo hum hain na wo zamana hai

wahshat-angez hai nasim-e-bahaar

kya junun-KHez ye zamana hai

saqiya arsh par hai apna dimagh

sar hai aur tera aastana hai

dagh-e-hasrat se dil ho malamal

yahi daulat yahi KHazana hai

mahsharistan-e-arzu-e-visal

dil hai kya ek kar-KHana hai

lo bujha chahta hai dil ka kanwal

KHatm ab ishq ka fasana hai

kya kahin uD ke ja nahin sakte

wo chaman hai wo aashiyana hai

'yas' ab aap mein na aaenge

wasl ek maut ka bahana hai