yar jab pesh-e-nazar hota hai

yaar jab pesh-e-nazar hotā hai

dil mirā zer-o-zabar hotā hai

ho ḳhajil baaġh meñ gul aab huā

jab siiñ gul-rū kā guzar hotā hai

dāġh-e-dil kuuñ mire nahīñ bahra-e-vasl

garche har gul kuuñ samar hotā hai

gard-e-ġham dilbar-e-ḳhush-chashm baġhair

surma-e-chashm-e-jigar hotā hai

dil liyā nargis-e-sāhir ne tirī

sach ki jaadū kuuñ asar hotā hai

teġh-e-abrū siiñ tirī ḳhauf nahīñ

dil mirā jā-e-sipar hotā hai

sham.a-rū kī shab-e-hijrāñ meñ 'sirāj'

aag ġham daaġh sharar hotā hai

yar jab pesh-e-nazar hota hai

dil mera zer-o-zabar hota hai

ho KHajil bagh mein gul aab hua

jab sin gul-ru ka guzar hota hai

dagh-e-dil kun mere nahin bahra-e-wasl

garche har gul kun samar hota hai

gard-e-gham dilbar-e-KHush-chashm baghair

surma-e-chashm-e-jigar hota hai

dil liya nargis-e-sahir ne teri

sach ki jadu kun asar hota hai

tegh-e-abru sin teri KHauf nahin

dil mera ja-e-sipar hota hai

shama-ru ki shab-e-hijran mein 'siraj'

aag gham dagh sharar hota hai