yar ka panw to aalam ka dahan sar hota

yaar kā paañv to aalam kā dahāñ sar hotā

kāshke maiñ bhī dar-e-yār kā patthar hotā

bose letā lab-e-shīrīñ ke jo sāġhar hotā

shīsha hotā to maiñ ham-pahlū-e-dilbar hotā

jalva-farmā jo kabhī vo mah-e-anvar hotā

sharaf-e-manzil-e-ḳhurshīd merā ghar hotā

dil-e-āshiq ke ye sau TukḌe kahāñ se hote

teġh-e-abrū meñ jo ġhamze kā na jauhar hotā

varaq-e-gul pe tire chehre kī likhtā tausīf

rag-e-bulbul se agar rishta-e-mistar hotā

ātish-e-ishq kī dil hī hai ki laatā hai taab

ḳhaak hotā jo is ātish meñ samundar hotā

lab-e-rangīñ kā agar rang dikhātā vo shoḳh

la.al be-rangī se billor kā patthar hotā

hosh ho jaate rafū-chakkar udhaḌte Tāñke

zaḳhm-e-dil siine ke darpe jo rafūgar hotā

apnī betābī-e-dil kī bhī maiñ likhtā hālat

ḳhat ke pahuñchāne ko loTan jo kabūtar hotā

josh-e-vahshat ke sabab raah pe aatā na kabhī

tere āvāra kā gar ḳhizr bhī rahbar hotā

qadd-e-bālā ke tasavvur meñ jo kartā fariyād

mere nāloñ kā guzar arsh-e-barīñ par hotā

aaj hotā jo sulaimāñ to tirī rakhtā muhr

aa.ina tujh ko dikhātā jo sikandar hotā

kisī hālat meñ nahīñ mujh ko surūr ai 'bāqī'

nashsha-e-mai se mire sar meñ hī chakkar hotā

yar ka panw to aalam ka dahan sar hota

kashke main bhi dar-e-yar ka patthar hota

bose leta lab-e-shirin ke jo saghar hota

shisha hota to main ham-pahlu-e-dilbar hota

jalwa-farma jo kabhi wo mah-e-anwar hota

sharaf-e-manzil-e-KHurshid mera ghar hota

dil-e-ashiq ke ye sau TukDe kahan se hote

tegh-e-abru mein jo ghamze ka na jauhar hota

waraq-e-gul pe tere chehre ki likhta tausif

rag-e-bulbul se agar rishta-e-mistar hota

aatish-e-ishq ki dil hi hai ki lata hai tab

KHak hota jo is aatish mein samundar hota

lab-e-rangin ka agar rang dikhata wo shoKH

lal be-rangi se billor ka patthar hota

hosh ho jate rafu-chakkar udhaDte Tanke

zaKHm-e-dil sine ke darpe jo rafugar hota

apni betabi-e-dil ki bhi main likhta haalat

KHat ke pahunchane ko loTan jo kabutar hota

josh-e-wahshat ke sabab rah pe aata na kabhi

tere aawara ka gar KHizr bhi rahbar hota

qadd-e-baala ke tasawwur mein jo karta fariyaad

mere nalon ka guzar arsh-e-barin par hota

aaj hota jo sulaiman to teri rakhta muhr

aaina tujh ko dikhata jo sikandar hota

kisi haalat mein nahin mujh ko surur ai 'baqi'

nashsha-e-mai se mere sar mein hi chakkar hota