yar ne is dil-e-nachiz ko behtar jaana

yaar ne is dil-e-nāchīz ko behtar jaanā

daaġh ko phuul to qatre ko samundar jaanā

kaT ga.e dekhte hī ham to tirī chashm-e-ġhazab

jumbish-e-abru-e-ḳhamdār ko ḳhanjar jaanā

sach hai yaksāñ hai adam aur vajūd-e-duniyā

aise hone ko na hone ke barābar jaanā

aañkh ham bāda-kashoñ se na milā ai jamshed

apne chullū ko tire jaam se baḌh kar jaanā

kab zamāne meñ hai mohtāj-e-makāñ ḳhāna-ḳharāb

ho ga.ī dil meñ kisī ke jo jagah ghar jaanā

samjhe 'jauhar' ko burā us kī shikāyat kyā hai

vahī achchhā hai jise aap ne behtar jaanā

yar ne is dil-e-nachiz ko behtar jaana

dagh ko phul to qatre ko samundar jaana

kaT gae dekhte hi hum to teri chashm-e-ghazab

jumbish-e-abru-e-KHamdar ko KHanjar jaana

sach hai yaksan hai adam aur wajud-e-duniya

aise hone ko na hone ke barabar jaana

aankh hum baada-kashon se na mila ai jamshed

apne chullu ko tere jam se baDh kar jaana

kab zamane mein hai mohtaj-e-makan KHana-KHarab

ho gai dil mein kisi ke jo jagah ghar jaana

samjhe 'jauhar' ko bura us ki shikayat kya hai

wahi achchha hai jise aap ne behtar jaana