yagana ban ke ho jae wo begana to kya hoga

yagāna ban ke ho jaa.e vo begāna to kyā hogā

jo pahchānā to kyā hogā na pahchānā to kyā hogā

kisī ko kyā ḳhabar aañsū haiñ kyuuñ chashm-e-mohabbat meñ

fuġhāñ se guuñj uTThegā jo vīrāna to kyā hogā

hamārī sī mohabbat tum ko ham se ho to kyā guzre

banā de sham.a ko bhī ishq parvāna to kyā hogā

yahī hogā ki duniyā aql kā anjām dekhegī

had-e-vahshat se baḌh jā.egā dīvāna to kyā hogā

ta.assub darmiyāñ se aap ko vāpas na le aa.e

haram kī raah meñ niklā sanam-ḳhāna to kyā hogā

tasavvur kījiye us aane vaale daur-e-barham kā

gadā toḌeñge jab pindār-e-shāhāna to kyā hogā

miTā do hasrat-e-ābādī-e-dil bhī mire dil se

ye jitnā ab hai is se aur vīrāna to kyā hogā

na tum aaoge na āvāz apnī lauT pā.egī

pukāregā tumheñ sahrā meñ dīvāna to kyā hogā

fareb-e-zindagī kī dāstāñ kahne ko kyā kam hai

qayāmat meñ zabāñ par aur afsāna to kyā hogā

lahū ke daaġh baḌh jā.eñge kuchh dīvār-e-zindāñ par

ḳhafā ho jā.egā zindāñ se dīvāna to kyā hogā

mudāvā ho nahīñ saktā hai dil par choT khāne kā

mire qadmoñ pe rakh do tāj-e-shāhāna to kyā hogā

'sabā' jo zindagī bhīgī huī hai bārish-e-gul se

bulā.egā kisī din us ko vīrāna to kyā hogā

yagana ban ke ho jae wo begana to kya hoga

jo pahchana to kya hoga na pahchana to kya hoga

kisi ko kya KHabar aansu hain kyun chashm-e-mohabbat mein

fughan se gunj uTThega jo virana to kya hoga

hamari si mohabbat tum ko hum se ho to kya guzre

bana de shama ko bhi ishq parwana to kya hoga

yahi hoga ki duniya aql ka anjam dekhegi

had-e-wahshat se baDh jaega diwana to kya hoga

tassub darmiyan se aap ko wapas na le aae

haram ki rah mein nikla sanam-KHana to kya hoga

tasawwur kijiye us aane wale daur-e-barham ka

gada toDenge jab pindar-e-shahana to kya hoga

miTa do hasrat-e-abaadi-e-dil bhi mere dil se

ye jitna ab hai is se aur virana to kya hoga

na tum aaoge na aawaz apni lauT paegi

pukarega tumhein sahra mein diwana to kya hoga

fareb-e-zindagi ki dastan kahne ko kya kam hai

qayamat mein zaban par aur afsana to kya hoga

lahu ke dagh baDh jaenge kuchh diwar-e-zindan par

KHafa ho jaega zindan se diwana to kya hoga

mudawa ho nahin sakta hai dil par choT khane ka

mere qadmon pe rakh do taj-e-shahana to kya hoga

'saba' jo zindagi bhigi hui hai barish-e-gul se

bulaega kisi din us ko virana to kya hoga