yahan har lafz mani se juda hai

yahāñ har lafz ma.anī se judā hai

haqīqat zindagī se māvarā hai

abhī chehre kā ḳhāka ban rahā hai

abhī kuchh aur bhī mere sivā hai

hameñ jo kuchh milā nāqis milā hai

magar ḳhush-fahmiyoñ kī intihā hai

koī chehra nahīñ ḳhushbū kā lekin

tamāshā phuul vāloñ kā lagā hai

maiñ us kī bārishoñ kā muntazir huuñ

vo mujh se mere aañsū māñgtā hai

yahī baa.is hai merī tishnagī kā

samundar mujh se paanī māñgtā hai

jahālat rog thā jo dil ke andar

vahī maz.hab hamārā ho gayā hai

muqaddas ho gayā hai jhuuT merā

mujhe to ab usī kā aasrā hai

maiñ pyāsā huuñ purāne mausamoñ kā

magar ab vo zamāna jā chukā hai

kahānī barg-e-sozāñ se ibārat

vagarna bahr-o-bar bhī hāshiya hai

nahīñ hai ḳhvāb sī tasvīr jis kī

to phir us ḳhvāb kī ta.abīr kyā hai

gumāñ hañgāma-ārā.ī kā aadī

yaqīñ tanhā.iyoñ meñ boltā hai

ye duniyā be-ḳhabar logoñ kī 'ahmad'

vo duniyā kā nahīñ jo jāntā hai

yahan har lafz mani se juda hai

haqiqat zindagi se mawara hai

abhi chehre ka KHaka ban raha hai

abhi kuchh aur bhi mere siwa hai

hamein jo kuchh mila naqis mila hai

magar KHush-fahmiyon ki intiha hai

koi chehra nahin KHushbu ka lekin

tamasha phul walon ka laga hai

main us ki barishon ka muntazir hun

wo mujh se mere aansu mangta hai

yahi bais hai meri tishnagi ka

samundar mujh se pani mangta hai

jahaalat rog tha jo dil ke andar

wahi mazhab hamara ho gaya hai

muqaddas ho gaya hai jhuT mera

mujhe to ab usi ka aasra hai

main pyasa hun purane mausamon ka

magar ab wo zamana ja chuka hai

kahani barg-e-sozan se ibarat

wagarna bahr-o-bar bhi hashiya hai

nahin hai KHwab si taswir jis ki

to phir us KHwab ki tabir kya hai

guman hangama-arai ka aadi

yaqin tanhaiyon mein bolta hai

ye duniya be-KHabar logon ki 'ahmad'

wo duniya ka nahin jo jaanta hai